ԱՄՆ-ը կշարունակի դերակատարում ունենալ՝ ՀՀ-ի և Ադրբեջանի միջև արժանապատիվ ու տևական խաղաղության հասնելու համար․ Պետդեպ

Միացյալ Նահանգները կշարունակի դերակատարում ունենալ Հայաստանի և Ադրբեջանի ղեկավարության հետ ամենաբարձր մակարդակներում շփումներում՝ արժանապատիվ և տևական խաղաղության հասնելու համար: Այս մասին հայտարարել է ԱՄՆ Պետաքարտուղարության մամլո փոխխոսնակ Վեդանտ Պատելը։

«Միացյալ Նահանգները կշարունակի դերակատարում ունենալ Ադրբեջանի և Հայաստանի ղեկավարության հետ ամենաբարձր մակարդակներում շփումներում՝ արժանապատիվ և տևական խաղաղության հասնելու համար։ Դուք նաև տեսել եք, որ մենք, վերջին շաբաթվա ընթացքում և դրանից հետո, կրկնում ենք Լեռնային Ղարաբաղում ավելի երկարաժամկետ, անկախ, միջազգային դիտորդական առաքելություն տեղակայելու մեր կոչը՝ ապահովելու թափանցիկություն և հավաստիացում, որ էթնիկ հայերի իրավունքները և անվտանգությունը պաշտպանված կլինեն, հատկապես նրանց համար, ովքեր կարող են ցանկանալ վերադառնալ, և մշակութային ժառանգության օբյեկտների պաշտպանության համար, ինչը, իհարկե, համահունչ է Ադրբեջանի հրապարակային հայտարարություններին և նրանց միջազգային պարտավորություններին»,- ասել է Պատելը:

Անդրադառնալով Արցախում ստեղծված իրավիճակին՝ Պետքարտուղարության պաշտոնյան ընդգծել է, որ չնայած ՄԱԿ-ի, այսպես կոչված, առաքելության այցին Արցախ, ԱՄՆ-ը շարունակում է պնդել միջազգային առաքելության հարցում։

«Մենք շարունակում ենք հավատալ, նույնիսկ ՄԱԿ-ի այցի լույսի ներքո, որ կա Լեռնային Ղարաբաղում ավելի երկարաժամկետ, անկախ միջազգային դիտորդական առաքելության մեծ ցանկություն և անհրաժեշտություն: Կարծում ենք՝ այն թափանցիկություն կապահովի։ Մենք կարծում ենք, որ դա կապահովի համապատասխան երաշխիքներ տարբեր իրավունքների և անվտանգության համար, որոնք շարունակում են խորապես մտահոգել մեզ»,- նշել է Պատելը։