Չեխիան և Լեհաստանը հսկողություն են սահմանում Սլովակիայի հետ սահմանին

Չեխիայի և Լեհաստանի իշխանությունները հայտարարել են, որ հոկտեմբերի 4-ից ժամանակավոր հսկողություն կսահմանեն Սլովակիայի հետ սահմանին՝ անօրինական միգրացիոն հոսքերը և միգրանտներին ուղղորդողների գործունեությունը զսպելու համար, գրում է DW-ի ռուսական ծառայությունը։

Չեխիայի ներքին գործերի նախարար Վիտ Ռակուշանի խոսքով՝ սահմանի ամբողջ երկայնքով պատահական ստուգումներ են իրականացվելու՝ այնպես, որ հնարավորինս քիչ սահմանափակվի միջսահմանային երթեւեկությունը։

Նախարարը հավելել է, որ Պրահան ժամանակավոր հսկողություն է սահմանում Լեհաստանի հետ համաձայնությամբ, որը նույն կերպ կվերահսկի Սլովակիայի հետ սահմանը։

«Մենք, իհարկե, կապի մեջ ենք ինչպես սլովակյան կողմի, այնպես էլ մեր ավստրիացի և գերմանացի հարևանների հետ»,- ընդգծել է նա։

«Կեսգիշերից սկսած՝ մենք կվերականգնենք սահմանային հսկողությունը Սլովակիայի հետ սահմանին», – լրագրողներին ասել է Լեհաստանի ներքին գործերի նախարար Մարիուշ Կամինսկին։

Ի սկզբանե երկու երկրներն էլ այս միջոցը ներդրել էին մինչև հոկտեմբերի 13-ը, բայց այն կարող է երկարաձգվել՝ կախված առկա իրավիճակից, նշել են երկու քաղաքական գործիչները։

Սլովակիայի վարչապետ Լյուդովիտ Օդորը հայտարարել է, որ Բրատիսլավան հոկտեմբերի 4-ին, արձագանքելու է Լեհաստանի և Չեխիայի կողմից սահմանային ստուգումների ներդրմանը։

Մի քանի օր առաջ Գերմանիայի ներքին գործերի նախարար Նենսի Ֆեյզերն էլ կարգադրել էր լրացուցիչ հսկողություն սահմանել Լեհաստանի և Չեխիայի հետ սահմաններին՝ անօրինական, մաքսանենգ ճանապարհով մարդկանց երկիր մտցնելու երթուղիների նկատմամբ։