16.01.2026 | 13:12
Ալեն Սիմոնյանի ճեպազրույցը. ՈւՂԻՂ
«Բրավո՛ Հայաստանի պատգամավորներին»․ ֆրանսիացի պատգամավորը Հռոմի ստատուտի վավերացումը կարևոր քայլ է համարել հայկական ժողովրդավարության համար
Քաղաքականություն
03.10.2023 | 16:02
Ֆրանսիայի Ազգային ժողովի պատգամավոր, Ֆրանսիա-Հայաստան բարեկամության խմբի նախագահ Անն Լորանս Պետելը X-ի իր միկրոբլոգում արված գրառմամբ անդրադարձել է ՀՀ ԱԺ-ի կողմից այսօր Հռոմի ստատուտի վավերացմանը։
«Հայաստանի խորհրդարանն այսօր վավերացրել է Հռոմի կանոնադրությունը և անդամակցությունը Միջազգային քրեական դատարանին։ Բրավո՛ Հայաստանի պատգամավորներին՝ այս համարձակ քվեարկության համար։ Ոչ մի վիրավորանք Մոսկվային, սա կարևոր քայլ է հայկական ժողովրդավարության համար։ Մենք կիսում ենք ոչ միայն պատմությունը, այլև արժեքները»,- գրել է Պետելը։
Հռոմի ստատուտի վավերացումը ողջունել է նաև Ֆրանսիայի ԱԳ նախարար Կատրին Կոլոննան։
«Երևանից ողջունում եմ Հայաստանի խորհրդարանի որոշումը՝ վավերացնել Հռոմի կանոնադրությունը և այդպիսով թույլ տալ Հայաստանին դառնալ Միջազգային քրեական դատարանի մասնակից պետություն։ Հանցագործությունների անպատժելիության դեմ պայքարը խաղաղության և կայունության պայման է»,- գրել է նա։
Հիշեցնենք՝ ՀՀ Ազգային ժողովն այսօր ձայների 60 կողմ, 22 դեմ հարաբերակցությամբ ընդունեց ՄՔԴ Հռոմի կանոնադրությունը վավերացնելու նախագիծը։
Հավելենք նաև, որ ՌԴ Դաշնային խորհրդի փոխնախագահ Յուրի Վորոբյովը ՀՀ խորհրդարանի կողմից Հռոմի ստատուտի վավերացումն անվանել է ոչ բարեկամական քայլ է Վլադիմիր Պուտինի նկատմամբ։
