30.05.2026 | 19:53
«Յունիսպորտը»` ֆուտզալի Հայաստանի չեմպիոն. ՏԵՍԱՆՅՈՒԹ
Թուրքիայում կրկին Մեծամորի ատոմակայանը փակելու կոչ են անում
Քաղաքականություն
03.10.2023 | 15:53
Թուրքիայի Ազգային Մեծ ժողովի նիստում Հայաստանի Մեծամորի ատոմակայանի հետ կապված հայտարարություններ են հնչել։ Մասնավորապես, հայտարարվել է, թե հայկական ատոմակայանը վտանգ է ներկայացնում ամբողջ տարածաշրջանի համար, գրում են թուրքական լրատվամիջոցները։
Թուրքիայի խորհրդարանի խնդրագրերի հանձնաժողովը, որը վերլուծում է քաղաքացիներից խորհրդարան ներկայացված միջնորդություններն ու բողոքները, խնդրանք է ստացել ատոմակայանից բխող վտանգների դեմ միջոցներ ձեռնարկել։ Հանձնաժողովը բողոքին արձագանքել է՝ հիմնվելով այս հարցում ներգրավված նախարարությունների, հիմնարկների և կազմակերպությունների կողմից տրամադրված տեղեկատվության վրա։
Պատասխանում նշվում է, որ Իգդիր քաղաքը մշակել է ճառագայթային արտակարգ գործողությունների ծրագիր, որը սահմանում է ռադիացիոն վթարի դեպքում պլանավորման և գործողությունների սկզբունքները։
Թուրքիայի ԱԳՆ-ի պատասխանում էլ հիշեցվում է, որ Մեծամորի ատոմակայանը գտնվում է Ատոմային էներգիայի միջազգային գործակալության (ՄԱԳԱՏԷ) վերահսկողության ներքո։
«Ատոմակայանը կառուցվել է մեր սահմանին շատ մոտ և հին տեխնոլոգիայով շահագործվող օբյեկտ է։ Կայանը ռիսկի գործոն է ողջ տարածաշրջանի համար։ Մեր տարածաշրջանը և աշխարհը չեն կարող իրենց թույլ տալ երկրորդ Չեռնոբիլ։ Մեծամորի ատոմակայանը պետք է փակվի։ Այս առումով խնդիրը կշարունակի մնալ մեր երկրի ուշադրության ներքո»,- ասվում է ԱԳՆ-ի պատասխանում։
Հիշեցնենք, որ Թուրքիան պարբերաբար անարդյունք քայլեր է ձեռնարկում այն փակելու համար ու անհիմն խոսում հայկական ատոմակայանի վտանգավորության մասին, այն դեպքում, երբ պաշտոնական Բաքուն էր 2020 թվականի հուլիսին Մեծամորի ԱԷԿ-ին հարվածով սպառնում։
Հավելենք, որ նախորդ տարի ՄԱԳԱՏԷ-ի գլխավոր տնօրեն Ռաֆայել Գրոսին այցելել էր Հայաստան, տեղում ծանոթացել իրավիճակին ու փաստել, որ Մեծամորի ԱԷԿ-ն անվտանգ է, և կառույցը բավարարված է հայկական կողմի աշխատանքից։
Էմմա Չոբանյան
