Ղազախստանի ԱԳՆ-ն երկրի մասին բացասաբար արտահայտվող օտարերկրացիների գրանցամատյան է վարում

Ղազախստանի ԱԳ նախարարության պաշտոնական ներկայացուցիչ Այբեկ Սմադիարովը հայտնել է, որ հանրապետության իշխանությունները գրանցում են օտարերկրացիներին, ովքեր բացասաբար են խոսում երկրի մասին։ Նրա խոսքով՝ այս ցուցակում հայտնված մարդկանց համար «սահմանը փակ է, և այդ մարդիկ չեն կարողանա մտնել» Ղազախստան։

«Բնականաբար, մենք ունենք այդ ցուցակը, բայց դա աշխատանքային ցուցակ է, չենք հրապարակի։ Պարզապես բոլոր հայտարարություններն աննկատ չեն մնում»,- ասել է Այբեկ Սմեդյարովը։

Լրագրողը նրան հարցրել է՝ արդյո՞ք Ղազախստանի ԱԳՆ-ն գրանցում է քաղաքացիների, ովքեր բացասաբար են արտահայտվել հանրապետության մասին՝ մեջբերելով մի մարդու, որը «զուգահեռներ է անցկացրել Ղազախստանի և Ուկրաինայի միջև»։

Ըստ KazTag-ի՝ հարցը տրվել է «ռուս էնդոկրինոլոգ Իլյա Մագերիի՝ Ղազախստանի դեմ ագրեսիվ հարձակման կապակցությամբ»։ Սոցցանցերում նա վիճել է իր հետևորդներից մեկի հետ, որը կարծիք է հայտնել, թե «նա պետք չէ Ղազախստանին»՝ նրան անվանելով «իմպերիալիստ»։

Բժիշկը նրան պատասխանել է, որ Ղազախստանի գիտությունների ակադեմիան «կառուցվել է այդ իմպերիալիստի կողմից», որ հենց նա է կրթել հանրապետության գիտնականների և արվեստագետների:

«Սակայն նրանց պատճառով, ովքեր ցնցում են ամեն ինչ, մենք պատերազմի մեջ կմտնենք»,- ասել է նա:

«Իմ կողմից մեծ ողջույններ միլիոնավոր լսարան ունեցող էնդոկրինոլոգին: Ավելի լավ է՝ թող նա մարդկանց բուժի, իր մասնագիտությամբ զբաղվի, քան իր կարծիքն արտահայտի։ Մենք բարիդրացիական հարաբերություններ ունենք Ռուսաստանի հետ և աշխատում ենք որպես բարեկամ, ռազմավարական պետություններ»,- Սմադիարովի խոսքերն է մեջբերում պարբերականը։

Սեպտեմբերի 28-ին Ղազախստանի նախագահ Կասիմ-Ժոմարտ Տոկաևը Գերմանիայի կանցլեր Օլաֆ Շոլցի հետ հանդիպման ժամանակ ասել էր, որ իր երկիրը միանշանակ կհետևի Ռուսաստանի դեմ պատժամիջոցների ռեժիմին։ Սեպտեմբերի 29-ին մեկնաբանելով իր հայտարարությունը՝ նա բացատրել է, որ Ղազախստանը հավատարիմ է Մոսկվայի հետ համագործակցությանը և հակառուսական չէ։