Քաղաքականություն
02.10.2023 | 18:31
Վրաստանի և Ադրբեջանի միջև վավերացվել է ռազմական համագործակցության ոլորտում համաձայնագիրը։ Ադրբեջանական լրատվականների հաղորդմամբ՝ Մեջլիսի այսօրվա լիագումար նիստում քննարկման է դրվել «Ադրբեջանի Հանրապետության կառավարության և Վրաստանի կառավարության միջև պաշտպանության ոլորտում համագործակցության մասին համաձայնագիրը հաստատելու մասին» օրենքը։
Նշվում է, որ համաձայնագրի նպատակն է խրախուսել և ամրապնդել կողմերի միջև պաշտպանության ոլորտում համագործակցությունը, ինչպես նաև գործնական հիմք ստեղծել կողմերի կողմից ընդունված ռազմական համագործակցության ծրագրերի իրականացման համար։
Փաստաթղթում նշվում է, որ կողմերը համագործակցելու են հետևյալ ոլորտներում՝ ռազմական կրթություն ու զորավարժություններ, պաշտպանության քաղաքականություն և անվտանգություն, խաղաղապահություն և հումանիտար գործողություններ, համագործակցություն ՆԱՏՕ-ի Գործընկերություն հանուն խաղաղության ծրագրի շրջանակում, զենքի վերահսկում և զինաթափում, ռազմական օրենսդրություն, ռազմատեխնիկական ապահովում, ռազմաքաղաքացիական համագործակցություն, կիբերանվտանգություն պաշտպանության ոլորտում, ռազմական քարտեզագրում, ռազմաբժշկական ծառայություններ, սոցիալական, սպորտային և մշակութային միջոցառումներ, մարդասիրական ականազերծում, փոխադարձ հետաքրքրություն ներկայացնող այլ ոլորտներ:
Համաձայնագրի կատարման համար լիազորված մարմիններն են Ադրբեջանի և Վրաստանի Պաշտպանության նախարարությունները։
Էմմա Չոբանյան
