02.10.2026 | 14:19
Ժորժե Ժեզուշը՝ Ռոնալդուի հետ կոնֆլիկտի մասին. «Կանոնները բոլորի համար նույնն են»
Հայաստան ներկրվող գազի 1000 խմ-ի համար հայկական կողմն այս տարի ավելի թանկ է վճարել
Տնտեսություն
28.09.2023 | 11:11
Հայաստան ներկրվող գազի գինը սահմանին բարձրացել է։ Այս տարվա առաջին կիսամյակում ռուսական գազի համար Հայաստանը 1000 խմ-ի դիմաց վճարել է 172․4 դոլար՝ 2021 թ-ի 165 դոլարի փոխարեն։ Պետական եկամուտների կոմիտեի տվյալների համաձայն՝ ներկրվել է 1 մլրդ 480․6 մլն խմ գազ, որի համար վճարվել է 255 մլրդ 373 մլն դոլար։ 2022 թ-ին Հայաստանը Ռուսաստանից 1000 խմ գազը գնել է 169 դոլարով։
2022 թ-ի մարտին ՀՀ կառավարությունը հայտարարել էր, որ առաջիկա 10 տարիների համար 165 դոլար սահմանին գազի գինը պահպանվելու է։
10 տարի 165 դոլար գնի պահպանման համար ՀՀ կառավարությունը «Գազպրոմ Արմենիա» ՓԲԸ-ին տարեկան 34․79 մլն ԱՄՆ դոլար է վճարում՝ որպես Հրազդանի 5-րդ էներգաբլոկի տարեկան հզորության վճար։
«Մենք միջոցներ ենք ձեռնարկել, ՀՀ-ի գազի գինը 165 դոլար 1000 խմ-ի համար, խնդրում եմ ուշադրություն դարձրեք, պահպանելու համար»,- 2022 թ-ի մարտին կառավարության նիստում հայտարարել էր ՀՀ վարչապետ Նիկոլ Փաշինյանը։
Հանրային ծառայությունները կարգավորող հանձնաժողովի նախագահ Գարեգին Բաղրամյանը նշել էր, որ 2013 թ-ին «Գազպրոմ Արմենիա» և «Գազպրոմ Էքսպորտ» ընկերությունների կնքած պայմանագրով արդեն իսկ եղել է կալորիայով ճշգրտման բանաձև, որն անընդհատ հետաձգվել է, բայց այլևս պետք է կիրառվի:
Ըստ պաշտոնյաների՝ ՀՀ մատակարարվող գազի կալորիականությունն (ջերմատվություն) ավելացել է և գինն էլ, ըստ դրա, ճշգրտվում է։
Սահմանված ստանդարտներով՝ 1 խմ գազի նվազագույն ջերմատվությունը 7900 Կկալ է։ 2021 թ-ին գազի կալորիականությունը կազմել է միջինում 8200 Կկալ և ավելի, առանձին ամիսներին՝ մինչև 8700 Կկալ։
Բացի «Գազպրոմ Արմենիայից», գազի ջերմատվությունը ստուգում են նաև խոշոր սպառողները՝ ՋԷԿ-երը, «Արարատցեմենտը»։
Ի դեպ, 2014 թ-ին կառավարությունը հանձնաժողով էր ստեղծել՝ գազի կալորիականությունը ստուգելու նպատակով։ Շուրջ 5 ամիս տևած ուսումնասիրություններից հետո հանձնաժողովը եզրակացրել էր՝ Հայաստանում գազի կալորիականության հետ կապված որևէ խնդիր չկա:
Թե ներկայում սահմանին գազի գնի բարձրացումն ինչպե՞ս կանդրադառնա սպառողների վրա, պարզ չէ։
Վերջին անգամ գազի սակագինը փոխվել է 2022 թ․ ապրիլի 1-ին՝ սովորական սպառողների համար բարձրանալով 4․7 դրամով և դառնալով 143.7 դրամ։
Գայանե Խաչատրյան
