Քաղաքականություն
23.09.2023 | 21:26Ոստիկանության կարմիրբերետավորները քիչ առաջ բերման են ենթարկել Մաշտոցի պուրակում վրան տեղադրելու շարժում սկսած նախաձեռնության անդամներին։ Այսօր բերման է ենթարկվել ութ հոգի։
Factor.am-ը սեպտեմբերի 21-ին էլ էր արձանագրել, որ նույն վայրում ոստիկանությունը թույլ չէր տվել նրանց վրան տեղադրել։ Այդ օրը բերման էին ենթարկվել հանրային գործիչներ Սուրեն Սահակյանն ու Միքայել Նահապետյանը։
Շարժման մասնակիցներն են Արժանապատվության շարժման անդամներին։ Նրանք ցանկանում են պուրակում վրան տեղադրելուց հետո քննարկել ՀՀ-ի շուրջ ստեղծված անվտանգային խնդիրները լուծելու սցենարները, այդ թվում՝ իշխանափոխության միջոցով։ Այս մասին Factor.am-ի հետ զրույցում ավելի վաղ ասել էր շարժման համակարգողներից Սուրեն Սահակյանը։
Factor.am-ին շարժման մասնակիցներից հայտնեցին, որ այսօր բերման են ենթարկել նախաձեռնության անդամներ Արամ Թարվերդյանին, Միքայել Նահապետյանին, Դավիթ Դավթյանին, Յուրի Մովսիսյանին, Տիգրան Ազիզյանին, Հայկ Սահակյանին, Արամայիս Պետրոսյանին և Արմեն Ֆլջյանին։
Նշենք, որ թեև նախաձեռնության անդամները բավականին քիչ են՝ մոտավոր հաշվարկով 20 հոգի, սակայն ոստիկանությունը մեծաթիվ ծառայողներով է ներկայանում։
Վրան տեղադրելու ակցիան խոչընդոտվում է արդեն մեկուկես ամիս։
Ավելի վաղ տեղեկացրել էինք՝ Երևանում այսօր բողոքի ակցիաների 19 մասնակից բերման է ենթարկվել։
Նարեկ Կիրակոսյան
