Ալիևի աշխատակազմը մանրամասներ է հայտնում Եվլախում տեղի ունեցած հանդիպումից

Ադրբեջանի նախագահ Իլհամ Ալիևի աշխատակազմը հայտարարություն է տարածել այսօր Եվլախում Արցախի ու Բաքվի ներկայացուցիչների հանդիպման վերաբերյալ։ Հայտարարության մեջ նշվում է, որ հանդիպմանը մասնակցել է նաև ռուս-թուրքական միացյալ մոնիտորինգի կենտրոնի ռուսական կողմի ղեկավար, կոնտր-ծովակալ Օլեգ Սեմենովը։
«Հանդիպմանը, որն անցել է կառուցողական և դրական մթնոլորտում, քննարկումներ են ծավալվել ենթակառուցվածքների վերականգնման, վերաինտեգրման և Ադրբեջանի Սահմանադրության ու օրենքների հիման վրա Ղարաբաղի հայ բնակչության գործունեության կազմակերպման վերաբերյալ»,-ասվում է հայտարարության մեջ։

Նշվել է «սեպտեմբերի 20-ի հայտարարության մեջ արտացոլված հարցերի արագ իրականացման կարևորությունը»։
Սոցիալական և հումանիտար բնույթի հարցերի քննարկման համատեքստում Արցախի ներկայացուցիչները նշել են վառելիքի հետ կապված խնդիրը։ «Միաժամանակ, նրանք սննդի տեսքով մարդասիրական օգնություն են խնդրել»։ Հաղորդվում է, որ խնդրանքը դրական է ընդունվել։ Մասնավորապես, նախատեսվում է առաջիկայում վառելանյութ մատակարարել՝ ապահովելով մանկապարտեզների և դպրոցների ջեռուցման համար, ինչպես նաև շտապ բուժօգնության և հրդեհաշիջման կարիքների համար։

Պայմանավորվածություն է ձեռք բերվել առաջիկայում անցկացնել հաջորդ հանդիպումը։

Ավելի վաղ հայտնել էինք, որ Արցախի հայերի ներկայացուցիչ Դավիթ Մելքումյանը Եվլախում ադրբեջանական կողմի հետ հանդիպման արդյունքներով Reuters-ին ասել է, որ Բաքվի հետ վերջնական պայմանավորվածություն չկա, մանրամասները պետք է համաձայնեցվեն։ Մելքումյանը նշել է, որ Արցախի հայ բնակչությունը համաձայնել է Բաքվի հետ զինադադարին, սակայն պայմանները դեռ պետք է մշակվեն։ «Մենք ունենք ռազմական գործողությունները դադարեցնելու պայմանավորվածություն, բայց սպասում ենք վերջնական համաձայնության, բանակցությունները շարունակվում են»,- նշել է Դավիթ Մելքումյանը։