30.05.2026 | 14:45
«Զվարթնոցում» ուղեբեռից հայտնաբերվել է 956 հազար եվրո․ 2 անձ ձերբակալվել է․ ՔԿ
Անդրանիկ Թևանյանը Հանրապետության հրապարակում ներկայացրել է իշխանափոխության իրենց ճանապարհային քարտեզը
Քաղաքականություն
19.09.2023 | 20:49
«Մայր Հայաստան» դաշինքի ղեկավար Անդրանիկ Թևանյանը միացել է Հանրապետության հրապարակում բողոքի ակցիա իրականացնող քաղաքացիներին։ Կառավարության շենքի դիմաց մեծաթիվ ոստիկանական ուժեր են կուտակված, այնտեղ է նաև ոստիկանապետ Արամ Հովհաննիսյանը։ Թևանյանը ոստիկաններին կոչ է արել քայլեր չձեռնարկել ՀՀ քաղաքացիների դեմ, իսկ քաղաքացիներին կոչ է արել չտրվել որևէ սադրանքի։
«Դիմում եմ Երևանի ավագանու ընտրություններին մասնակցած և չմասնակցած քաղաքացիներին: Երեք ժամվա ընթացքում հավաքվե՛ք Հանրապետության հրապարակում, և այդ դեպքում ես խոստանում եմ ճանապարհային հստակ քարտեզով խնդիրը լուծել և հասնել Նիկոլ Փաշինյանի հրաժարականին: Արցախում Ադրբեջանի հանցավոր գործողությունները բացի այն, որ Ադրբեջանն ինքն է նախաձեռնել, պատճառ ու հետևանք է այն բանի, որ Նիկոլ Փաշինյանը ճանաչել է Արցախը որպես Ադրբեջանի մաս: Դա տեղի է ունեցել պաշտոնապես 2022-ի հոկտեմբերի 6-ին Պրահայում: Հետևաբար, ես այս հրապարակի անունից դիմում եմ իշխանության աթոռը զավթածներին՝ հրաժարվեք պրահյան գործընթացից»,-Կառավարության շենքի դիմացից հայտարարեց Թևանյանը: Ըստ նրա՝ Փաշինյանը պիտի պաշտոնապես հրաժարվի Արցախը ճանաչել Ադրբեջանի տարածքային ամբողջականության մեջ։
«Եթե ինքը չի հրաժարվում պրահյան գործընթացից և չի հրաժարվում Արցախն Ադրբեջանի մաս ճանաչելու իր որոշումից, այս կարճ ժամանակահատվածում հնարավորություն չի ստեղծում ՀՀ դիվանագիտության համար ճանապարհներ գտնել, ինքը պետք է պատրաստ լիլի հրաժարական տալու և ԱԺ արտահերթ նիստում մենք պետք է ընդունենք նոր կառավարություն, որի ձևավորումից ամիսներ կամ մեկ տարի անց տեղի կունենան ԱԺ նոր ընտրություններ»,- ընդգծեց Թևանյանը:
Արփի Հակոբյան
