Վարդան Ղուկասյանը Մարությանին և Թևանյանին առաջարկում է համագործակցել

«Հանրային ձայն» կուսակցության ղեկավար Վարդան Ղուկասյանը, որը հետախուզման մեջ է, տեսաուղերձով դիմել է Երևանի ավագանու անցողիկ շեմը հաղթահարած ընդդիմադիր ուժերին՝ Մարությանի գլխավորած «Ազգային առաջընթաց» կուսակցությանն ու «Մայր Հայաստան» Դաշինիքին՝ կոալիցիա կազմելու համար։

Նա դեմ չէ Մարությանի ու Թևանյանի՝ քաղաքապետի պաշտոնում թեկնածությանը, բայց պահանջում է վերահսկողական ֆունկցիաները հանձնել իր կուսակցությանը։

Ղուկասյանը նաև ենթադրություն է հնչեցրել, որ Արտակ Զեյնալյանի գլխավորած «Հանրապետություն» կուսակցությունը, ամենայն հավանականությամբ, կոալիցիա կկազմի ՔՊ-ի հետ։

Հիշեցնենք՝ Երևանի ավագանու ընտրություններին մասնակից քաղաքական ուժերի ստացած քվեները բաշխվել են հետևյալ կերպ․ Հանրային ձայն կուսակցություն- 22,431 կամ 9.68% Քաղաքացիական պայմանագիր կուսակցություն- 75,463 կամ 32.57% Արդար Հայաստան կուսակցություն- 2,595 կամ 1.12% Հաղթանակ կուսակցություն 3,959 կամ 1.71% Ուժը հայրենյաց կուսակցություն 1,706 կամ 0.74% Հայաստանի եվրոպական կուսակցություն- 2,572 կամ 1.11% Ազգային առաջընթաց կուսակցություն- 43,765 կամ 18.89% Հանուն սոցիալական արդարության կուսակցություն- 780 կամ 0.34% Հանրապետություն կուսակցություն- 26,236 կամ 11.32% Միացյալ Հայաստան կուսակցություն- 1,282 կամ 0.55% Լուսավոր Հայաստան կուսակցություն- 4,174 կամ 1.80% Ժողովրդավարական համախմբում կուսակցություն- 2,348 կամ 1.01% Ապրելու երկիր կուսակցություն- 8,425 կամ 3.64% Մայր Հայաստան կուսակցությունների դաշինք- 35,739 կամ 15.43% Արդյունքում՝ որևէ կուսակցության կամ դաշինքի չի հաջողվել հաղթահարել 50 տոկոսի շեմը և չի կարողանա միանձնյա քաղաքապետ ընտրել։

Արփի Հակոբյան