Սնուփ Դոգի համերգը կազմակերպում ենք, որ չասեն` Հայաստանը կոտրվել է, ծնկի է եկել. Փաշինյան. ՏԵՍԱՆՅՈՒԹ

Մենք Երևան քաղաքն ազատագրել ենք քրեական տարրերի գերիշխանությունից: Այս մասին այսօր Երևանի քաղաքապետարանի դիմաց ՔՊ-ի հանրահավաքի ժամանակ իր ելույթում նշեց ՀՀ վարչապետ Նիկոլ Փաշինյանը։

«2018-ից ի վեր կառավարությունը Երևանում զրոյից կառուցել է 11 նոր դպրոց: Սեպտեմբերին 3 նոր դպրոց բացեցինք: Այսօր ևս 11 դպրոց գտնվում է շինարարության ամենատարբեր փուլերում: Երևանում 24 մանկապարտեզի հիմնանորոգման աշխատանք է սկսվել, որից 7-ն արդեն շահագործման են հանձնվել»,-ասաց Փաշինյանը:

Նա նշեց, որ Երևանում 25 մանկապարտեզների սեփականաշնորհման հետ կապված քրեական գործեր կան հարուցված և վստահեցրեց՝ դրանք վերադարձվելու են երևանցուն:

«2018-ի մայիսից մինչև այսօր Երևանում 37 հազար ընտանիք տուն է գնել նորակառույց շենքերում և դա ձեռք է բերվել կառավարության որդեգրած քաղաքականության շնորհիվ»,-ասաց Փաշինյանը:

Վարչապետի դիտարկմամբ՝ մշակութային կյանքը եռում է Երևանում, և ըստ նրա՝ դրա վկայությունը կլինի նաև սեպտեմբերի 23-ին Երևանում կայանալիք Սնուփ Դոգի համերգը։

Անդրադառնալով հարցին՝ ինչու՞ է կառավարությունը 6  միլիոն դոլար հատկացնում՝ այդ համերգի կազմակերպման համար, Փաշինյանը պարզաբանեց․ «Մենք ասում ենք՝ մենք 3 000 տարվա ժողովուրդ ենք, 3 000 տարվա պետություն ենք։ Իսկ որևէ մեկը վիճակագրություն արե՞լ է՝ «Հայաստան» բառը աշխարհի բնակչության քանի՞ տոկոսը գիտի։ Եվ այո, այդ թվում՝ դրա համար ենք անում։ Երբ որ նման մասշտաբի աստղերի համերգ է տեղի ունենում Հայաստանում, Հայաստան անունը շրջանառվում է աշխարհում, երիտասարդության շրջանում, սոցիալական ցանցերում։ Մենք դա անում ենք Հայաստան անվան համար, որ որևէ մեկը չմտածի, թե Հայաստանը չկա, որ որևէ մեկը չմտածի, թե Հայաստանը կոտրվել է, թե Հայաստանը ծնկի է եկել, Հայաստանը կա և լինելու է»,- «բացատրեց» Փաշինյանը։

Մանրամասները՝ տեսանյութում։