05.11.2026 | 21:28
Արսեն Ոսկանյանը նշանակվել է Համայնքային ոստիկանության գլխավոր վարչության պետ-ոստիկանության պետի տեղակալ
Իրանի ԶՈՒ ԳՇ պետն ու Ադրբեջանի ՊՆ ղեկավարը քննարկել են տարածաշրջանում իրավիճակը
Քաղաքականություն
13.09.2023 | 19:59
Ադրբեջանի ՊՆ ղեկավար Զաքիր Հասանովը հեռախոսազրույց է ունեցել Իրանի ԶՈՒ Գլխավոր շտաբի պետ Մոհամեդ Հոսեյն Բաղերիի հետ։ Ադրբեջանի ՊՆ-ի հաղորդմամբ՝ կողմերը մտքեր են փոխանակել տարածաշրջանում տիրող իրավիճակի և անվտանգության հարցերի շուրջ։
«Բաղերին ընդգծել է, որ որոշ ուժերի կողմից տարածված կեղծ տեղեկատվությունը, թե Իրանը կենդանի ուժ և զինտեխնիկա է կուտակում Ադրբեջանի հետ սահմանին և տարբեր զորավարժություններ անցկացնում, անհիմն են։ Նա նշել է, որ նման տեղեկատվության տարածումը նպատակ ունի վնասել երկրների միջև գոյություն ունեցող բարեկամությանը և բարիդրացիական հարաբերություններին»,- ասվում է հաղորդագրության մեջ։
Հասանովն ու Բաղերին քննարկել են նաև Ադրբեջանի և Իրանի միջև ռազմական համագործակցության զարգացման հեռանկարները։
Հիշեցնենք, որ օրերս Բաքվում էր իրանական Զինված ուժերի պատվիրակությունը՝ գեներալ-մայոր Մուհամեդ Ահադիի գլխավորությամբ։ Տեղի է ունեցել Ադրբեջանի և Իրանի Իսլամական Հանրապետության ԶՈՒ գլխավոր շտաբերի ռազմական համագործակցության համատեղ հանձնաժողովի 3-րդ նիստը։ Իրանական պատվիրակությունը նաև մի շարք հանդիպումներ է ունեցել տարբեր պաշտոնյաների, այդ թվում՝ Զաքիր Հասանովի հետ։
Էմմա Չոբանյան
