Հիմա էլ ուզում են անունս վերցնել․ Արթուր Աղաբեկյանը խախտում է լռությունը

Հատուկ քննչական ծառայությունից հայտնում են, որ Արցախի նախկին փոխվարչապետ, գեներալ-լեյտենանտ Արթուր Աղաբեկյանի հայրական առանձնատանը խուզարկություն է կատարվել Մանվել Գրիգորյանի գործի շրջանակում, և Արթուր Աղաբեկյանը չունի ո՛չ կասկածյալի, ո՛չ վկայի կարգավիճակ: Լուրը Factor.am-ի հետ զրույցում հաստատեց ՀՔԾ մամուլի խոսնակ Մարինա Օհանջանյանը։

Թե ինչ կապ ունի Արթուր Աղաբեկյանի հայրական տունը Մանվել Գրիգորյանի գործի հետ և ինչ են հայտնաբերել այնտեղ խուզարկությունից հետո, փորձեցինք պարզել գեներալ-լեյտենանտ Արթուր Աղաբեկյանից․

-Պարո՛ն Աղաբեկյան, Հատուկ քննչական ծառայությունը հաղորդում է, որ Ձեր հայրական տան խուզարկությունը կատարվել է Մանվել Գրիգորյանի գործի շրջանակներում։ Ի՞նչ են այնտեղից հայտնաբերել խուզարկությունից հետո։

-Այդ գործողության մասին ոչ մի բառ չեմ ուզում ասել, ես կարծում եմ, որ ընդամենը իմ հայրական տունը շփոթել են Մանվել Գրիգորյանին պատկանող տներից մեկի հետ։

-Կարծում եք` խուզարկություն իրականացնողները կշփոթեի՞ն, խոսքը գնում է կարևոր պետական կառույցի հաղորդման մասին, ի՞նչ շփոթմունքի մասին է խոսքը։

-Այո՛, ես կարծում եմ, որ շփոթմունք է եղել, ուրիշ բան չունեմ ասելու։

-Պարո՛ն Աղաբեկյան, ավելի վաղ մեզ հետ զրույցում նշել էիք, որ առհասարակ չեք ցանկանում խոսել և կպահպանեք 6-ամսյա լռություն, բայց փոխարենը շատ ակտիվ եք Ձեր ֆեյսբուքյան էջում և շատ արագ հրապարակում եք Ձեր շուրջ կատարվողը: Օրինակ, Ձեր հայրական տան խուզարկության մասին լրատվամիջոցները տեղեկացան հենց Ձեր էջի միջոցով, այսինքն՝ այլևս մտադիր չե՞ք լռել։

-Որովհետև ամեն բան տվեցի, հիմա էլ ուզում են անունս վերցնել։ Դա է պատճառը։

-Ձեր վերջին գրառման մեջ նշել էիք նաև, որ 2015 թվականից չեք շփվում Մանվել Գրիգորյանի հետ։ Ո՞րն էր ձեր շփումների դադարեցման պատճառը։

-Մանվել Գրիգորյանի հետ չէի շփվում իմ և նրա ապրելակերպերի, իմ և նրա մտածելակերպերի տարբերության պատճառով։ Այլևս հարցեր մի տվեք, վատառողջ եմ, թողեք ինձ հանգիստ։

Հիշեցնենք՝ իր գրառման մեջ Արթուր Աղաբեկյանը նշել էր, որ «ակնկալում է Արցախի Հանրապետությունում քաղաքական գնահատական տեղի ունեցածի մասով և գրավոր դիմել է Արցախի Հանրապետության Գլխավոր դատախազին և ԱԱԾ-ին՝ նմանատիպ խայտառակ որոշման գործադրումը Արցախի Հանրապետությունում հանձն առնելը պարզաբանելու նպատակով»:

Աղավնի Սուքիասյան