16.03.2026 | 23:18
ԵՄ-ն պատժամիջոցներ է սահմանել չինական և իրանական ընկերությունների նկատմամբ՝ կիբերհարձակումների համար
Թուրքիայի իշխող կուսակցությունում երեք անձի են դիտարկում որպես Էրդողանին փոխարինող
Քաղաքականություն
06.09.2023 | 23:30
Gazete Pencere-ի լրագրող Նուրայ Բաբաջանը գրում է, որ իշխող «Արդարություն և զարգացում» կուսակցության ներսում չկա որևէ մեկը, «որը չխոսի և չմտածի նախագահ Ռեջեփ Թայիփ Էրդողանից հետոյի մասին»։
Բաբաջանը նշում է, որ կուսակցության ներսում Էրդողանից հետո որպես ԱԶԿ-ի առաջնորդ դիտարկում են հիմնականում երեք գործիչների։ Այդ անունների շարքում առաջինը Էրդողանի փեսան է՝ Սելջուկ Բայրաքթարը՝ անօդաչու թռչող սարքեր արտադրող Baykar ընկերության համասեփականատերը։
«Ասում են, որ կա խորհրդականների նոր թիմ, որը փորձում է ապահովել, որ Բայրաքթարն ապագայում դառնա քաղաքական գործիչ։ ԱԶԿ-ի որոշ անդամներ, որոնց անհանգստացնում են Օսմանյան կայսրության «մեծ վեզիրի փեսայի» ավանդույթը կենդանի պահելու փորձերը, ասում են, որ դա այսօրվա Թուրքիայում չի աշխատի։ Պաշտպանության ոլորտում ընկերության ներդրումներից զատ՝ պաշտպանական արդյունաբերության ոլորտում նշանակումների հարցում Բայրաքթարի ուժը ԱԶԿ-ի ներսում սովորական հարցի պես է խոսվում»,- գրում է լրագրողը։
Հիշեցնենք, որ Factor TV-ն ավելի վաղ անդրադարձել էր նաև Սելջուկ Բայրաքթարի՝ քաղաքականություն մտնելու մասին հայտարարություններին։
Երկրորդ գործիչը արտաքին գործերի նախարար, Ազգային հետախուզական գործակալության (MİT) նախկին ղեկավար Հաքան Ֆիդանն է։
«Թիմը, որը գործում է ԱԶԿ-ի հիմնադրումից ի վեր, պնդում է, որ եթե Ֆիդանը հաջողության հասնի քաղաքականության մեջ, առավելություն կունենա: Նրանք ասում են, որ Ֆիդանի հզորությունն արտաքին քաղաքականության մեջ և նրա լուռ դիվանագիտական հաջողությունները կբացեն այն դուռը, որ նրան պետք է՝ հասարակության աչքում «հետախուզության ղեկավարի» կերպարից քաղաքացիական քաղաքական գործչի կերպարի անցնելու համար»,- նշում է Բաբաջանը։
Երրորդ գործիչը ԱԶԿ-ի պատգամավոր, ներքին գործերի նախկին նախարար Սուլեյման Սոյլուն է, որն ընտրություններից հետո քիչ է հայտնվում հանրության ու լրատվամիջոցների առաջ։
«Քիչ չեն նրանք, որոնք պնդում են, թե Սոյլուի լռությունը ժամանակավոր է, և որ նա ճիշտ ժամանակին կհայտնվի: Ասում են, որ Սոյլուն Էրդողանից հետո բացահայտ պայքար է սկսելու, և որ նրան այցելողների թիվը երբեք չի նվազում, դրա լավագույն օրինակն է։ Բացի այդ, նշվում է, որ Սոյլուն միակ մարդն է, որն ունի հանրային աջակցություն երեք անունների մեջ»,- գրում է Բաբաջանը։
Հիշեցնենք, որ մայիսի 28-ին նախագահական ընտրությունների երկրորդ փուլում Էրդողանը վերընտրվեց նախագահի պաշտոնում։
Էմմա Չոբանյան
