Քաղաքականություն
06.09.2023 | 18:13
ՀՀ հատուկ հանձնարարություններով դեսպան Էդմոն Մարուքյանն անդրադարձել է Ադրբեջանի նախագահի օգնական Հիքմեթ Հաջիևի՝ Arab News-ին տված հարցազրույցում հնչեցրած պնդումներին։
«Ալիևի օգնական Հիքմեթ Հաջիևը Arab News-ին տված հարցազրույցի ժամանակ ասել է, որ Լաչինի միջանցքն արգելափակված չէ և Լեռնային Ղարաբաղում շրջափակում չկա։ Այդպիսով՝ Ադրբեջանը ցանկանում է խաբել միջազգային հանրությանը Լաչինի միջանցքի անօրինական արգելափակման փաստի վերաբերյալ․ միջազգային այնպիսի հայտնի կազմակերպություններ, ինչպիսիք են Human Rights Watch-ը, ՄԱԿ-ի ԱԽ-ն, Արդարադատության միջազգային դատարանը հաստատել են, որ միջանցքը փակ է, մարդիկ էլ՝ սովամահության եզրին»,- X-ի իր էջում գրել է Էդմոն Մարուքյանը։
Նա նաև հարց է բարձրացնում՝ եթե շրջափակում չկա, ինչո՞ւ է Բաքուն իր, այսպես կոչված, հումանիտար բեռներն ուզում հասցնել Արցախ։
«Ի վերջո, եթե Լաչինի միջանցքը փակված չէ, և Լեռնային Ղարաբաղում պաշարում ու սով չկա, ինչպես պնդում է Ալիևի օգնականը, ապա ինչո՞ւ է Ադրբեջանն Աղդամ ուղարկել այդ խորհրդավոր մարդասիրական օգնությունը»,- եզրափակել է Մարուքյանը։
