12.01.2025 | 22:00
Ընտրությունները կեղծվեցին, բայց մենք էլ չպատրաստվեցինք այնպես, ինչպես անհրաժեշտ էր․ Զուրաբիշվիլի
Չնայած տնտեսական քաղաքականության փոփոխություններին՝ Թուրքիայում գնաճը չի նվազում․ տարեկան գնաճը հասել է 60%-ի
Քաղաքականություն
05.09.2023 | 23:30
Թուրքիայում հրապարակված պաշտոնական տվյալների համաձայն՝ օգոստոսին երկրում տարեկան գնաճը կազմել է 58,94 տոկոս, իսկ սպառողական գները, նախորդ ամսվա համեմատ, աճել են 9,09 տոկոսով։ Թուրքիայի վիճակագրական ինստիտուտը (TUIK) հայտնել է, որ տարեկան գնաճը, նախորդ տարվա նույն ժամանակահատվածի համեմատ, աճել է 59 տոկոսով, գրում է Al Monitor-ը։
Տվյալների հրապարակումից հետո Թուրքիայի ֆինանսների նախարար Մեհմեթ Շիմշեքը հայտարարել է, որ այժմ երկիրը գտնվում է տնտեսական անցումային շրջանում։
Ռեջեփ Թայիփ Էրդողանի՝ նախագահի պաշտոնում վերընտրվելուց հետո Շիմշեքը նշանակվել էր երկրի տնտեսական քաղաքականության պատասխանատուն՝ Անկարայի՝ ավելի ավանդական տնտեսական քաղաքականության անցման շրջանակում, մինչ երկիրն ապրում է ամենավատ տնտեսական ճգնաժամերից մեկը։
«Մենք գիտենք, որ գնաճի դեմ պայքարը ժամանակ է պահանջում։ Մենք անցումային շրջանում ենք։ Մենք կանենք այն ամենը, ինչ անհրաժեշտ է։ Մենք բացարձակապես վճռական ենք պայքարելու գնաճի դեմ»,- գրել է Շիմշեքը X-իր էջում։
Ըստ տվյալների՝ տրանսպորտն ամսական սպառողական գների աճի հիմնական շարժիչ ուժն է, որը մասամբ աճել է 16,61 տոկոսով՝ վառելիքի հաջորդական թանկացումների պատճառով: Կենցաղային տեխնիկայի և պարենային ապրանքների գներն օգոստոսին ամսական գնաճի երկրորդ և երրորդ պատճառն են եղել՝ աճելով, համապատասխանաբար, ավելի քան 9 և 8 տոկոսով։
Ի դեպ, Թուրքիայի գնաճի հետազոտական խմբի (ENAG – անկախ հաստատություն, որը ստեղծվել է 2020 թվականին երկրի գնաճին հետևելու համար) ոչ պաշտոնական տվյալների համաձայն՝ օգոստոսին երկրում սպառողական գների տարեկան գնաճը կազմել է 128,05 տոկոս, ինչը շատ ավելին է, քան պաշտոնական պնդումները: Ըստ ENAG-ի՝ օգոստոսին Թուրքիայում գներն աճել են ամսական 8,59 տոկոսով, ինչը ցածր է TÜİK-ի ցուցանիշից:
Թուրքիայում տարեկան գնաճը կրկին սկսեց ավելանալ հուլիսին՝ ութամսյա նվազման միտումից հետո: Երկրի տարեկան գնաճը հոկտեմբերին հասել էր 24 տարվա առավելագույնին՝ 85,5 տոկոս՝ թուրքական լիրայի արագ անկման ֆոնին, որը հիմնականում պայմանավորված է Էրդողանի ոչ ավանդական տնտեսական քաղաքականությամբ։
Էմմա Չոբանյան
