Ֆորմալ առումով ճիշտ են թե՛ Նիկոլ Փաշինյանը, թե՛ Սվիտալսկին. Ստեփան Գրիգորյան. ՏԵՍԱՆՅՈՒԹ

Վարչապետ Նիկոլ Փաշինյանի առաջին աշխատանքային այցը Բրյուսել, ըստ էության, ճանաչողական այց  էր: Այս մասին այսօր Factor.am-ի հետ զրույցում ասաց «Գլոբալիզացիայի և տարածաշրջանային համագործակցության վերլուծական կենտրոնի» նախագահ Ստեփան Գրիգորյանը՝ անդրադառնալով նախորդ շաբաթ վարչապետի՝  Բրյուսել կատարած այցին: «Դա վարչապետի առաջին այցն էր և Եվրամիություն, և ՆԱՏՕ, քանի որ գիտեք՝ այդ երկու կենտրոնները գտնվում են Բրյուսելում: Նիկոլ Փաշինյանին ընդունեցին բավական լավ, ֆոնն ընդհանուր առմամբ շատ դրական էր, և դա քաղաքականության մեջ շատ կարրևոր է»,- նշեց քաղաքագետը:

Ըստ Գրիգորյանի՝ թե՛ ՆԱՏՕ-ի և թե՛ Եվրամիության բարձրաստիճան պաշտոնյաները ուզում էին հասկանալ՝ ում հետ գործ ունեն: Քաղաքագետն ընդգծեց՝ այդ կառույցները վերջին 20 տարիներին արդեն սովորել էին առնչվել Հայաստանի ոչ լեգիտիմ ղեկավարների հետ: «Հիմա իրենք սկսեցին շփվել մարդու հետ, ում լեգիտիմությունը հանրության շրջանում շատ մեծ է: Իրենք սովոր էին, որ Հայաստանի ղեկավարները «կզած» էին գնում, այժմ իշխանության է եկել լեգիտիմ անձ, որը հարցեր է բարձրացնում, պահանջներ դնում»,- շարունակեց մեր զրուցակիցը:

Քաղաքագետն անդրադարձավ նաև նոր իշխանության՝ կոռուպցիայի դեմ մղած պայքարին՝ ընդգծելով, որ այդ պայքարը պետք է հասնի նախկին առաջին դեմքերին: «Շատ արդյունավետ կլիներ, եթե նախկին վարչապետներից կամ նախագահներից մեկը, որը խարդախությունների մեջ է, ձերբակալվի: Եվրամիության դեսպաններից մեկն, օրինակ, այսօր հետաքրքրվում էր՝ արդյոք ձերբակալվածներն ու կալանավորվածները նախկին նախարարներ են կամ վարչապետեր, ասում եմ՝ ոչ, ասում են՝ լավ էդ դեպքում կսպասենք»,- շարունակեց Ստեփան Գրիգորյանը՝ հավելելով, որ ժամանակ է անհրաժեշտ, որպեսզի կոռուպցիայի դեմ մղվող պայքարը լիարժեք հավատ ներշնչի Հայաստանի միջզգային գործընկերներին:

Հարցազրույցն ամբողջությամբ՝ տեսանյութում:

Շողիկ Գալստյան