Իշխանափոխություն Արցախում․ ինչ է հաջորդելու Արայիկ Հարությունյանի հրաժարականին. ՏԵՍԱՆՅՈՒԹ

Արցախի նախագահ Արայիկ Հարությունյանն այսօր հայտարարեց հրաժարական տալու իր որոշման մասին։ Վաղ առավոտից տելեգրամյան ալիքներում շրջանառվող լուրերը Հարությունյանը հաստատեց կեսօրին մոտ՝ ֆեյսբուքյան գրառմամբ, միևնույն ժամանակ տեղեկացնելով, որ պաշտոնից ազատել է 7 ամիս առաջ Արցախի պետնախարար նշանակված Գուրգեն Ներսիսյանին։ Մեկ այլ հրամանագրով Հարությունյանը հեռանալուց առաջ պետնախարար է նշանակել Արցախի Անվտանգության խորհրդի քարտուղար Սամվել Շահրամանյանին։

Արայիկ Հարությունյանը հայտարարել է, որ վաղը հրաժարականի իր դիմումը կներկայացնի Ազգային Ժողով։ Պատճառների մասին Հարությունյանը շատ փակագծեր չի բացում: Փոխարենը խոստովանում է՝ 44-օրյա պատերազմից հետո իշխանության, մասնավորապես, նախագահի հանդեպ վստահության պակաս կա, ինչը խոչընդոտում է պատշաճ կառավարման հետագա ընթացքին։

«Այս վերջնական որոշումը ես կայացրել եմ երկու օր առաջ՝ հաշվի առնելով վերջին շաբաթների իմ շփումները բոլոր ներքին ու արտաքին դերակատարների և լայն հանրության հետ: Սա իմ ունեցած տվյալների վերլուծության արդյունքների հիման վրա կշռադատված որոշում է՝ կայացված բացառապես իմ կողմից»,- գրել է Հարությունյանը։

Պարզ չէ, թե ներքին և արտաքին կոնկրետ ինչ դերակատարաների մասին է խոսքը։

Արցախի նախագահի հրաժարականի մասին 44-օրյա պատերազմից հետո պարբերաբար է խոսվել, սակայն դրանք վերածվեցին կոնկրետ քննարկումների հատկապես Լաչինի միջանցքի շրջափակումից հետո։ Այդ ընթացքում պաշտոնը թողնելու մասին խոսել է նաև անձամբ Հարությունյանը՝ մե՛կ հերքելով այդ լուրերը, մե՛կ նշելով, թե անհրաժեշտության դեպքում պատրաստ է հրաժարական տալ։

Հարությունյանի հեռանալու առնչությամբ վերջին քննարկումից մեկ շաբաթ էլ չի անցել։ Արցախի նախկին և ներկա պաշտոնյաների հետ ավելի քան վեց ժամ տևած փակ քննարկումնից հետո դիմելով Վերածննդի հրապարակում հավաքված քաղաքացիներին՝ Հարությունյանը վստահեցրել էր, թե պատրաստ է հեռանալ։ Այդ հանդիպման ներկաներից ընդդիմադիր պատգամավոր Մետաքսե Հակոբյանն ասում է՝ այդ օր հրաժարականի մասին խոսելիս Հարությունյանը նշում էր, թե կքննարկի հարցը և կտեղեկացնի, իսկ թե ինչ շրջանակների հետ Արցախի նախագահը պետք է խոսեր իր հեռանալու մասին, ներկաներին պարզ չի եղել։

Քննարկե՞լ է, արդյոք, Հարությունյանն իր հեռանալու հարցը Նիկոլ Փաշինյանի հետ։ Վարչապետի խոսնակը հրաժարվեց մեկնաբանել։

Եվ մինչ Արցախի և Հայաստանի հասարակական քաղաքական դաշտը քննարկում է Արցախի նախագահի հեռանալու հնարավոր հետևանքները, Factor.am-ի տեղեկություններով՝ արդեն որոշված է, թե ով է լինելու հաջորդ նախագահը։ Եթե ամեն ինչ ընթանա ըստ պայմանավորվածության, առաջիկա օրերին Արցախի Ազգային ժողովը նախագահ կընտրի պետնախարար նշանակված Սամվել Շահրամանյանին։ Արայիկ Հարությունյանը վստահեցնում է՝ նրան, որպես պետնախարար, տրվել են լայն լիազորություններ:

Մանրամասները՝ տեսանյութում։

Շողիկ Գալստյան