Հաղորդաշարեր
20.08.2023 | 21:02Factor TV-ի A-politic հաղորդաշարի հյուրն է Գինու ազգային կենտրոնի նախագահ Ավագ Հարությունյանը: Նրա կարծիքով՝ հայերը խաղողին և գինուն սակրալ նշանակություն էին տալիս հազարամյակներ շարունակ: Երբ որսը փոխարինվեց հողագործությամբ, խաղողը՝ որպես խորը արմատներ և շատ բարձր աճելու հնարավորություն ունեցող բույս, հանդես եկավ որպես երկիրն ու երկինքը կապող է խորհրդանիշ: Արարատյան դաշտավայրը դարձավ այն այն տեղը, որտեղից սկսվեց նոր քաղաքակրթությունը:
Անդրադառնալով իսլամական, մասնավորապես՝ սուֆիստական մշակույթին, հաղորդման հյուրը նշում է, որ գինու արգելքի և արաբական բանաստեղծների՝ գինու գովերգման մեջ իրականում հակասություն չկա: Գինեգործության հետ կապված բոլոր եզրույթներն այդ մշակույթում ունեն այլաբանական, փոխաբերական իմաստ՝ Աստծո հետ ձուլվելու գաղափարն իրականացվում է սիրո և դրանից առաջացող հոգևոր էքստազի միջոցով:
Խոսելով ռուսական կայսրությունում ալկոհոլի յուրահատուկ օգտագործման մասին՝ Ավագ Հարությունյանն ուշադրություն է դարձնում այն հանգամանքի վրա, որ ցարական Ռուսաստանում մի քանի անգամ ալկոհոլն արգելվում էր: Դա տեղի էր ունենում այն ժամանակ, երբ երկրում գործերը քիչ թե շատ նորմալ էին գնում, և կառավարությունը սկսում էր մտածել մարդկանց առողջության մասին: Բայց երբ խնդիրները խորանում էին, այդ դեպքում ալկոհոլի օգտագործումն ազատականացվում էր:
«Երբ չես կարողանում կառավարել հասարակությունը, ամենահեշտ ճանապարհը հարբեցողությունն ու թմրամոլությունն է»,- ասում է Ավագ Հարությունյանը:
Մանրամասները՝ տեսանյութում:
Արամ Աբրահամյան
