Մեր մարտունակությունը պետք է բարձրացնենք. ՊՆ նորանշանակ փոխնախարար Հրաչյա Սարգսյան․ ՏԵՍԱՆՅՈՒԹ

Պաշտպանության նախարարն ու փոխնախարարները, համաձայն ՀՀ օրենսդրության, պարտադիր չէ, որ զինվորական լինեն։ Այսօր կառավարության նիստից հետո լրագրողների հետ ճեպազրույցում նշեց պաշտպանության նորանշանակ փոխնախարար, Երևանի նախկին քաղաքապետ Հրաչյա Սարգսյանը։

«Զինվորականներն անում են իրենց աշխատանքը, մենք անում ենք մեր աշխատանքը։ Ունենք զինուժ, ունենք գլխավոր շտաբի պետ, և զինվորականները զբաղվում են այն գործառույթներով, որով որ զբաղվում են, համատեղ ամեն մեկս մեր ունեցած փորձով ներդրում ենք ունենում մեր բանակում»,- նշեց Սարգսյանը։

Թե պաշտպանության նախարարությունում կոնկրետ որ ոլորտն է ինքը համակարգելու, առայժմ փոխնախարարը ցանկացավ չնշել։ Շեշտեց` աշխատանքը բացարձակ խորթ չէ իր համար, քանի որ կառավարման հմտություններ է պահանջում։

Թե ինչ խնդիրներով, գործընթացներով է հիմա զբաղվում, ևս չցանկացավ նշել` շեշտելով` պետք չէ խոսել այն մասին, որը կարող է մեր հակառակորդի համար արժեքավոր տեղեկատվություն պարունակել։

Անդրադառնալով հարցին՝ արդյո՞ք իրեն նշանակել են, որ Սուրեն Պապիկյանին վերահսկի, Սարգսյանն արձագանքեց․ «Լա՜վ էլի»։

«Մենք պետք է մեր մարտունակությունն ու գործընթացների արդյունավետությունը բարձրացնենք, որ կարողանանք մեր նպատակներին հասնել»,- ընդգծեց պաշտպանության նախարարի տեղակալը։

Հիշեցնենք՝ Հրաչյա Սարգսյանը պաշտպանության փոխնախարար է նշանակվել օգոստոսի 3-ին։ Մինչ այդ նա վարչապետի խորհրդականն էր, ավելի վաղ՝ Երևանի քաղաքապետը։

Մանրամասները՝ տեսանյութում։