Քաղաքականություն
10.08.2023 | 21:02Արցախում և Արցախի շուրջ իրադարձությունների մասին Factor TV-ն զրուցել է ՀՀ ԱԺ «Պատիվ ունեմ» խմբակցության քարտուղար Տիգրան Աբրահամյանի հետ
–Պարո՛ն Աբրահամյան, այս ընթացքում կարևոր իրադարձություններից մեկը Դավիթ Իշխանյանի ընտրությունն է Արցախի խորհրդարանի նախագահի պաշտոնում, ընդ որում՝ երեք հոգանոց խմբակցությունից։ Ձեր մեկնաբանությունը։
-Շատ կարևոր է հասկանալ, որ Դաշնակցությունն ու ևս երկու ուժ հուշագրով միմյանց հետ համագործակցությամբ կապված են, և ես չէի համարի, որ սա ուղղակի ընտրություն է եղել երեք հոգանոց Դաշնակցություն խմբակցությունից։ Սա, ըստ էության, ընդդիմության երեք ուժերի թեկնածուի ընտրությունն էր։
Երկրորդ՝ ակնհայտ է, որ այսօր ստեղծված իրավիճակը, հատկապես Հայաստանի ինքնաօտարումը Արցախի հետ կապված հարցերից, ենթադրում է Արցախում գործող բոլոր կառույցների, հատկապես՝ խորհրդարանի առավելագույն ակտիվացմանը։ Ես կարծում եմ՝ խորհրդարանում առանձնապես մեծ ընտրություն էլ չի եղել։
–Արցախի նախագահ Արայիկ Հարությունյանը կոշտ քննադատում է Հայաստանի ընդդիմությանը, բայց Հայաստանի ընդդիմության արցախյան թևից ընտրվում է Արցախի խորհրդարանի նախագահ։
-Այդքան համաձայն չեմ, որ Արայիկ Հարությունյանը կոշտ քննադատում է Հայաստանի ընդդիմությանը։ Թեև նրա խոսքում նկատելի է, որ հայաստանյան իշխանությանն ուղղվող հորդորների համատեքստում փորձում է որոշաի հավասարակշռություն պահպանել և որոշակի ոչ առաջնային թեմաների շուրջ նաև հայաստանյան ընդդիմության ուղղված որոշակի անուղղակի ձևակերպումներ է հնչեցնում, ինչն անթույլատրելի է և կատարյալ հիմարություն է, հատկապես՝ այս իրավիճակում։ Բայց իրավիճակն այնպիսին է, որ երկրի ներսում՝ Արցախում, փաստացի Արայիկ Հարությունյանը վերահսկողությունը կորցնելու բավականին մեծ ռիսկ է տեսնում և փորձում է, ընդդիմությանը երկրի երկրորդ պաշտոնը փոխանցելով, որոշակի բալանսը պահպանել։
Տեսեք՝ Արցախի Սահմանադրությամբ երկրի նախագահի հրաժարականի կամ այլ պայմաններում այդ պաշտոնին չլինելու պարագայում լիազորություններն անցնում են խորհրդարանի նախագահին։ Այսինքն՝ ստեղծված է մի իրավիճակ, որ եթե լինի որոշում կամ հանգամանք ու այնպես դասավորվի, որ Արցախի նախագահը հրաժարական տա, ապա երկրի կառավարումն անցնելու է ընդդիմությանը։
Սա մի կողմից այդ որոշման օգտին խոսող հանգամանք է։ Երկրորդ՝ սա ավելի լիարժեք կլինի այն դեպքում, երբ քաղաքական վերադասավորումները շարունակվեն, և այս համատեքստում հնարավոր լինի իշխանության վերաբաշխում կատարել և այսօրվա գործող իշխանության լիազորությունները փոխանցել նաև այնպիսի դերակատարների (դրանք կարող են չլինել Արցախի խորհրդարանից), որը հնարավորություն կտա երկրում ստեղծված իրավիճակում հնարավորինս արդյունավետ գործիքակազմ մտածել։
Հարցազրույցն ամբողջությամբ՝ տեսանյութում։
Գարիկ Հարությունյան
