25.04.2026 | 21:33
Մանվել Խնձրցյանը և Վազգեն Թևանյանը տպավորիչ հաղթանակներով դարձան ԵԱ-ի բրոնզե մեդալակիրներ. ՏԵՍԱՆՅՈՒԹ
Օպերային թատրոնում առանձին մեխանիզմի մասին խոսք լինել չի կարող․ Օրբելյանը հակադարձել է դիրիժորին
12.07.2018 | 17:00
Factor.am-ը օրեր առաջ հրապարակել էր «Անկազմակերպ վիճակ և առանց հստակ գրաֆիկի աշխատանք օպերային թատրոնում․ ինչո՞ւ Օրբելյանը ականջալուր չի լինում դիրիժորի ահազանգին» վերնագրով նյութ, որի շրջանակում ներկայացրել էր թատրոնի դիրիժոր Զավեն Վարդանյանի մտահոգությունները։
Դրանց շուրջ մեկնաբանություն ստանալու նպատակով Factor.am-ը դիմել էր Ալ․ Սպենդիարյանի անվան օպերայի և բալետի ազգային ակադեմիական թատրոն։ Մեր հարցերին պատասխանել է թատրոնի տնօրեն, գեղարվեստական ղեկավար Կոնստանտին Օրբելյանը։ Նրա պատասխանում նախ նշվում է, որ թատրոնի աշխատողների աշխատանքային գրաֆիկները սահմանված են թատրոնի տնօրենի 2011 թվականի ապրիլի 20-ի թիվ 78 հրամանով հաստատված «Ա․ Սպենդիարյանի անվան օպերայի և բալետի ազգային ակադեմիական թատրոն» պետական ոչ առևտրային կազմակեպության ներքին կարգապահական կանոններով։
Բացի այդ՝ թատրոնի աշխատողների աշխատաժամանակը կանոնակարգվում է նաև նրանց հետ կնքված աշխատանքային պայմանագրերով ու առանձին աշխատանքային գրաֆիկներով՝ նվագախմբի, մեներգիչների, երգչախմբի և բալետի համար։ «Թատրոնն այժմ աշխատում է ծանրաբեռնված գրաֆիկով, այս տարի տեղի է ունենալու 5 ներկայացման առաջնախաղ, 3 հյուրախաղ արտերկրում՝ 8 օպերային և բալետային ներկայացումներով։ Թատրոնի գեղարվեստական գործընթացի պլանավորման, կոորդինացման կամ վերահսկման գործառույթների իրականացման համար թատրոնում կան համապատասխան աշխատակիցներ»,-ասված է պատասխանում։
Մեզ հետ զրույցում Զավեն Վարդանյանը պնդել էր, որ թատրոնն ապահովված չէ բավարար երաժշտական գործիքներով։ Նրա խոսքով՝ հստակ պակաս կա կոնտրաբասների մասով, որոնք հավաքված են «դեսից-դենից»։
Կոնստանտին Օրբելյանը սրան ի պատասխան նշել է․«Թատրոնն ունի համապատասխան երաժշտական գործիքներ։ Դրանց որոշ մասը, ինչպես և Հայաստանի բոլոր նվագախմբերում, չունի բարձր որակ։ Սակայն ցանկանում ենք հայտնել, որ թատրոնն իր գործունեությունը հիմնականում իրականացնում է պետական բյուջեից տրվող սուբսիդիայի հաշվին, որով չեն նախատեսվում երաժշտական գործիքներ ձեռքբերելու համար միջոցներ։
Աշխատանքներ են տարվում հովանավորների միջոցով որակյալ գործիքներ ձեռք բերելու ուղղությամբ»։
Ինչ վերաբերում է դիրիժորի այն մտահոգությանը, որ բավարար չափով համալրված չէ նվագախմբի և երգչախմբի կազմը, պարոն Օրբելյանն արձագանքել է․
«Թատրոնում աշխատում են ներկայացումները պատշաճ որակով ցուցադրելու համար անհրաժեշտ կազմեր և կարող ենք նշել, որ մինչ օրս թատրոնի նվագախումբն ու երգչախումբը լիովին կատարել են իրենց վրա դրված պարտականությունները և ցուցաբերել են բարձր կատարողական որակ»։
Դիրիժորն Օրբելյանին առաջարկել է ստեղծել գեղարվեստական աշխատանքի պլանավորման, կոորդինացման և վերահսկման բաժին։ Նրա պատկերացմամբ՝ կառավարման խորհուրդն իր որոշումների մասին կարող էր տեղեկացնել հենց կոորդինացման բաժնին։ Factor.am-ը հարցրել էր՝ արդյոք կա՞ նման մեխանիզմի կիրառման կարիք։
Գեղարվեստական ղեկավարը, սակայն, շեշտել է, որ թատրոնի կանոնադրության 40-րդ կետի համաձայն թատրոնն ունի ութ անձից բաղկացած խորհուրդ, որի կազմը հաստատում է ՀՀ մշակույթի նախարարը։ «Կառավարման խորհրդի լիազորությունները սահմանված են թատրոնի կանոնադրությամբ, խորհուրդն իրականացնում է թատրոնի ընդհանուր կառավարումը և նշյալ կոորդինացման բաժնի հետ հարաբերությունները պետք է լինեն այնպիսին, ինչպիսին մյուս ստորաբաժանումների հետ, և առանձին մեխանիզմի մասին խոսք լինել չի կարող»,-նշել է նա։
Աննա Բաբաջանյան
