Մարդկանց փորձում են համոզել, որ կարելի է լինել դերասան առանց մասնագիտական կրթության. ապաքաղաքական զրույց Սառա Նալբանդյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է մշակութաբան, դրամատուրգ, Երևանի թատրոնի և կինոյի ինստիտուտի ռեկտոր Սառա Նալբանդյանը: Նրա կարծիքով՝ ուսուցման այն մեթոդները, որոնք կիրառվել են վերջին տասնամյակներում, պետք է վերաիմաստավորվեն: Մասնավորապես, «արվեստանոցների» համակարգն առնվազն լրացումների կարիք ունի: Թատերական ինստիտուտի ռեկտորն այս հարցում կողմ է ռոտացիոն սկզբունքին:

Խոսելով հայկական սերիալների զգալի մասի ոչ բարձր որակի մասին՝ հաղորդման հյուրը նշում է, որ դրա հիմնական պատճառը հապճեպությունն է, էժանի հետևից ընկնելը: Սցենարիստը մի գիշերում գրում է հաջորդ սերիայի սցենարը, առավոտյան դերասանները պետք է նկարահանվեն, հաճախ՝ առանց ռեժիսորի:

Թատերագետը բացասաբար է վերաբերվում «փողոցից» մարդ բերելու և սերիալում նկարահանելու պրակտիկային: Ըստ նրա՝ մարդկանց փորձում են համոզել, որ դերասան կարելի է դառնալ առանց մասնագիտական կրթության:

Արդյո՞ք դերասանական խաղը պետք է լինի արժանահավատ: Ըստ Սառա Նալբանդյանի՝ եթե խոսքը կինոյի մասին է, ապա պատասխանը պետք է լինի միանշանակ դրական: Թատրոնում ամեն ինչ կախված է ռեժիսորի դրված խնդիրներից: Պայմանականության աստիճանը, ընդհանուր առմամբ, թատրոնում բարձր է, և հենց այդ պատճառով թատերական կատարումները, որպես կանոն, արագ են հնանում: Մշակութաբանը, այնուամենայնիվ, շեշտում է, որ անկախ ժամանակաշրջանից՝ հայ հանդիսատեսը պահանջում է թատերական ներկայացումներից և կինոֆիլմերից էմոցիոնալ բարձր լարում:

Մանրամասները տեսանյութում:

Արամ Աբրահամյան