Մնացական Մարտիրոսյանը պարզաբանեց, թե որն է իր հաջողության գրավականը․ ՏԵՍԱՆՅՈՒԹ

Երևանի քրեական դատարանի դատավոր Մնացական Մարտիրոսյանը 2018 թվականին Հայաստանում տեղի ունեցած իշխանափոխությունից առաջ ընկալվում էր որպես իշխանություններին հաճո դատավոր: Հայաստանում տեղի ունեցած իշխանափոխությունից հետո թվում էր, թե նոր իշխանությունները պետք է ցանկանան ազատվել դատավոր Մարտիրոսյանից, սակայն վերջինս նոր իշխանությունների օրոք ընդհուպ առաջխաղացում ունեցավ՝ դառնալով Երևանի քրեական դատարանի նախագահ: Դատավորների ընդհանուր ժողովին այսօր մասնակցող Մարտիրոսյանից փորձեցինք ճշտել՝ որն է վերջինիս հաջողության գրավականը:

«Իմ հաջողության գրավականը Ձեր նման հաճելի մարդկանց հետ հաճախակի շփվելն է»,- պատասխանեց Մարտիրոսյանը՝ ըստ էության խուսափելով պատասխանել հարցին:

Դատավորից փորձեցինք հետաքրքրվել նաև, թե վերջինս ինչ խնդիրներ է տեսնում Երևանի քրեական դատարանում, որի նախագահն է: Մարտիրոսյանը, որը մշտապես ասում է, թե ԲԴԽ լրատվական ծառայությանը դիմենք, կրկին նշեց, որ պետք է հարցերը մշակել և ուղղել իրեն:

Նկատի ունենալով, որ դատավորներից ոմանք լրագրողներին հարցազրույցներ չեն տալիս՝ նշելով, թե վերջիններս պետք է նախապես դիմեն ԲԴԽ լրատվական ծառայությանը՝ դեռևս նախորդ՝ հուլիսի 19-ին տեղի ունեցած դատավորների ընդհանուր ժողովից առաջ Factor TV-ն գրություն էր ուղարկել Դատական դեպարտամենտ՝ խնդրելով դատավորներին թույլատրել հարցազրույցներ տալ:

Գրության մեջ, մասնավորապես, նշել էինք․

«Դատավորներից շատերը, որոնք մասնակցում են ժողովին, լրատվամիջոցների հարցերին չեն պատասխանում՝ նշելով, որ Բարձրագույն դատական խորհրդից թույլտվություն չունեն։

Նման վարքագծով հատկապես աչքի է ընկնում Երեւանի քրեական դատարանի նախագահ Մնացական Մարտիրոսյանը։ Հետևաբար, սույն գրությամբ խնդրում եմ բոլոր դատավորներին թույլատրել ԶԼՄ- ներկայացուցիչներին, այդ թվում՝ Factor.am-ի լրագրողներին՝ հարցազրույցներ տալ և ցանկության դեպքում պատասխանել նրանց հուզող հարցերին։ Խնդրում եմ ԲԴԽ-ի կողմից թույլտվության առկայության մասին տեղյակ պահել բոլոր դատավորներին, այդ թվում՝ պարոն Մնացական Մարտիրոսյանին»:

Ի պատասան այս գրության՝ Դատական դեպարտամենտից հայտնել են հետևյալը.

«Տեղեկացվում է, որ դատավորների՝ լրատվության միջոցներով հանդես գալու թույլտվության կարգ սահմանված չէ: Միաժամանակ տեղեկացվում է, որ ԲԴԽ-2-Ն-1 որոշմամբ սահմանված կարգով՝ դատավորները ԶԼՄ-ով կարող են հանդես գալ ինչպես մամուլի ծառայության միջոցով, այնպես էլ սեփական հայեցողությամբ, հետևաբար նրանք ազատ են լրատվամիջոցների հետ շփումներում և հուսով ենք քաջատեղյակ են իրենց խոսքի ազատության սահամանփակումներին, որոնք նախատեսված են «Հայաստանի Հանրապետության դատական օրենսգիրք» սահմանադրական օրենքի համապատասխան հոդվածներով»:

Երբ դատավոր Մնացական Մարտիրոսյանին հայտնեցինք Դատական դեպարտամենտից դիրքորոշման մասին, առաջարկեց գրությունն իրեն ցույց տալ, սակայն մինչ ցույց կտայինք, ասաց, որ շտապում է ու հեռացավ։

Արաքս Մամուլյան