ՌԴ ԱԳՆ․ Բաքվի և Երևանի միջև հապճեպ նախապատրաստված հաշտության պայմանագիրը կհանգեցնի նոր հակամարտությունների

Ադրբեջանի և Հայաստանի միջև հապճեպ խաղաղության պայմանագիր կնքելու փորձը՝ ի վնաս որակի և պատշաճ պատրաստվածության,  ապագայում կհանգեցնի նոր հակամարտությունների։ Այս մասին ՏԱՍՍ-ին տված հարցազրույցում հայտարարել է ՌԴ ԱԳՆ ԱՊՀ երկրների չորրորդ վարչության տնօրեն Դենիս Գոնչարը։
«Հապճեպ պատրաստված, հում խաղաղության պայմանագիրը կայուն խաղաղություն չի բերի տարածաշրջանին, ընդհակառակը, այն ապագայում նոր հակամարտությունների ու ողբերգությունների հիմք կդնի։ Առաջնահերթությունը պետք է տրվի ոչ թե արագությանը, այլ հավասարակշռված և փոխընդունելի որոշումների որակյալ պատրաստմանը»,- ասել է դիվանագետը։

Նա ուշադրություն է հրավիրել այն փաստի վրա, որ «արևմտյան մայրաքաղաքներից պարբերաբար հայտարարություններ են հնչում այն մասին, թե Բաքուն և Երևանը կկարողանան խաղաղության պայմանագիր կնքել մոտակա շաբաթների և ամիսների ընթացքում»։

Ըստ Գոնչարի՝ Ռուսաստանը ելնում է այն բանից, որ ստորագրման ժամկետները պետք է կողմերն իրենք որոշեն։ «Պատասխանատու միջնորդների խնդիրն է ոչ թե արագացնել բանակցային գործընթացը՝ հանուն պատեհապաշտ նկրտումների, այլ օգնել հասնելու տեւական, երկարաժամկետ պայմանավորվածությունների։
Դրանք պետք է հիմնված լինեն տեղում ձևավորված իրողությունների վրա, առաջին հերթին ամենաբարձր մակարդակով ռուս-հայ-ադրբեջանական հայտարարությունների և դրանց հիման վրա գործող մեխանիզմների վրա»,- ասել է ՌԴ ԱԳՆ ԱՊՀ երկրների չորրորդ վարչության տնօրենը։