Պատերազմը կանգնեցնելու իրական հնարավորությունը երրորդ երկրի տեղակայումն էր. Տոնոյան․ ՏԵՍԱՆՅՈՒԹ

«Մարդկանց թերարժեքության բարդույթ ներարկելու փոխարեն պետք է դասեր քաղել ու օր ու գիշեր աշխատել»: Այս մասին 2020 թվականի 44-օրյա ռազմական գործողությունների հանգամանքներն ուսումնասիրող քննիչ հանձնաժողովի այսօրվա նիստի իր եզրափակիչ խոսքում նշեց պաշտպանության նախկին նախարար Դավիթ Տոնոյանը

«Ես գիտեմ, որ որդի կորցրած ծնողին ոչինչ սփոփել չի կարող: Բայց գիտեմ նաեւ, որ այն զինվորներն ու սպաները, որոնք իրենց կյանքը տվեցին հանուն հայրենիքի, արժանի են նրան, որ իրենց անունները ոսկե տառերով գրվեն մեր ազգի պատմության մեջ: Շատ հաճախ նրանք անում էին անհնարինը՝ որովհետեւ գիտեին, թե ինչ բան է հայրենիքը:

Շատերը մեր հասարակությունում չեն գիտակցում, թե ինչ է կատարվել մինչեւ 1994 թվականը, երբ հաստատվեց զինադադարը: Մարդիկ հաճախ լավ չէին պատկերացնում, թե մենք որտեղ ենք գտնվում, ինչ խնդիր ենք լուծում, ինչ առաքելություն ունենք:

Այսօր էլ կարծում եմ, որ մեր հասարակությունը 1994 թվականի հաղթանակի կարեւորությունը չգիտակցեց եւ չգնահատեց այնպես, ինչպես որ պետք էր: Եվ գոնե հիմա՝ խոնարհվելով 2020 թվականին եւ դրանից հետո զոհված մեր եղբայրների շիրիմների առջեւ, մենք պետք է հարգենք նրանց արածը:
Պատերազմից հետո առիթ եմ ունեցել ասելու, որ մենք պարտություն ենք կրել բոլոր առումներով անհավասար մարտում, բայց դա որեւէ մեկին իրավունք չի տալիս խաղալ մեր ժողովրդի ազգային արժանապատվության հետ: Մարդկանց թերարժեքության բարդույթ ներարկելու փոխարեն պետք է դասեր քաղել ու օր ու գիշեր աշխատել:

Մենք չափազանց բարձր գին ենք վճարել, հազարավոր երիտասարդներ իրենց կյանքն են տվել հանուն Հայրենիքի, իսկ «ամեն ինչ ավարտված է» ոճով ելույթներն անարգում են նրանց հիշատակը: Նրանք իրենց կյանքը տվել են, որպեսզի մենք այսօր ջանքեր գործադրենք, վերլուծենք սխալները ու գտնենք արժանապատիվ կյանքին վերադառնալու ճանապարհը: Նրանք իրենց կյանքը չեն տվել նրա համար, որ մենք բարձր ամբիոններից ելույթներ լսենք այն մասին, որ ամեն ինչ վերջացած է եւ պետք է համաձայնվենք մեզ պարտադրվող բոլոր պայմաններին», – նշեց Տոնոյանը:

Եվս մաեկ անգամ անդրադառնալով հարցին՝ պատերազմը կանգնեցնելու իրական հնարավորություն եղե՞լ է թե՞ ոչ, Տոնոյանն ընդգծեց․ «Պատերազմը կանգնեցնելու իրական հնարավորությունը միայնու միայն երրորդ երկրի զինված տեղակայումն էր «թատերաբեմում», այլ տարբերակ գոյություն չունի։ դա միայն իմ գնահատականը չէ, և պատահական չէ, որ խաղաղապահներ կամ խաղաղություն պարտադրող ուժեր են տեղակայվում»։

Նշենք, որ ԱԺ 44-օրյա պատերազմի հանգամանքներն ուսումնասիրող քննիչ հանձնաժողովի այսօրվա նիստի ժամանակ Տոնոյանը նաև նշել էր, որ արցախյան 44-օրյա պատերազմում ծավալվող գործողություններն իրենց ծավալով այնպիսի ռազմական գործողություններ էին, որ դրանք հնարավոր չէր կանգնեցնել պայմանագրերով․ «Ամսի 9-ի համաձայնությունները, ոչ մեկ երաշխիք չուներ, որ կիրականացվեն։ Դրա երաշխիքը եղել է խաղաղապահների ներկայությունը, այսինքն՝ երրորդ ուժի ներկայությունը «թատերաբեմում»։ Դա է եղել պատերազմը կանգնեցնելու միակ գրավականը»։

Մանրամասները՝ տեսանյութում։