Իմ աչքերով տեսա՝ ինչպես է գնդակոծվում ռուսական սահմանապահ զորքերի կայանը, ինքս եմ նկարահանել․ Դավիթ Տոնոյան․ ՏԵՍԱՆՅՈՒԹ

Ին՞չ էր անում Դավիթ Տոնոյանը` որպես ՀՀ պաշտպանության նախարար, 2020 թ. հոկտեմբերի 21-29–ը Մեղրիում։ ՀՀ ԱԺ 44-օրյա պատերազմի հանգամանքներն ուսումնասիրող քննիչ հանձնաժողովի այսօրվա նիստում անդրադառնալով այս հարցին՝ պաշտպանական գերատեսչության նախկին ղեկավարը հայտարարեց, որ Մեղրիում իր գտնվելու գնահատականը կարող է տալ միայն իր վերադասը։

Նա պատմեց, որ այդ ժամանակ ՀՀ պետական սահմանից ընդամենը 2-3 կմ հեռավորության վրա արդեն կային բավականին մեծ քանակությամբ զոհեր, վիրավորված էր Մեղրիի համայնքի ղեկավարը, գնդի հրամանատարը, ձևավորվում էր հարավային շրջանի հատուկ հրամանատարություն, որը ղեկավարեց այսօր արդեն գեներալ Գյոզալյանը։

Տոնոյանի համոզմամբ` իր հայտնվելը Մեղրիում, որպես պաշտպանության նախարար, բավականին լուրջ ազդեցություն ունեցավ և զինուժի, և բնակչության վրա։

«Այդ ժամանակ ես իմ աչքերով տեսա, թե ինչպես է գնդակոծվում ռուսական սահմանապահ զորքերի ստորաբաժանման կայանը Մեղրիում։ Ես ինքս եմ տեսանկարահանել դա․․․ Այդ ժամանակ Մեղրիում դրոշներ էին դրվում, դրոշներ էին հանվում, ուժեր էին տեղափոխվում։

Ամեն դեպքում ես ունեի նաև այլ գործառույթ` հստակ համադրված համագործակցություն ունենալ ՌԴ սահմանապահ ուժերի հետ, որը հաստատվեց ու շատ լուրջ համագործակցություն եղավ, որի համար ես շատ շնորհակալ եմ։ Այնպես ստացվեց, որ միայն ՌԴ սահմանապահ ուժերի ստորաբաժանումն էր, որ գտնվում էր անմիջական մարտական գործողությունների վարման շատ հասանելի տարածքում»,- նշեց Տոնոյանը։

Պաշտպանության նախկին նախարարը վստահեցրեց, որ ինչ հնարավոր էր, արվել է Մեղրիում 2020 թ. հոկտեմբերին. մոբիլիզացիայի փոքր խնդիր կար, սակայն դա էլ արագ լուծվեց․ «Աշխատում էր մի կուռ թիմ»։

Մանրամասները՝ տեսանյութում։