Թուրքիայի ներգրավվածության մասին հաշվարկ չենք ունեցել․ Դավիթ Տոնոյան․ ՏԵՍԱՆՅՈՒԹ

Ազգային ժողովում մեկնարկել է 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստը՝ պաշտպանության նախկին նախարար Դավիթ Տոնոյանի մասնակցությամբ։

Ես հաստատ հիշում եմ, որ Անվտանգության խորհրդում խոսակցություն եղել է այն մասին, որ ՀՀ ԶՈւ-ն ունակ չէ կանգնեցնել թշնամու ագրեսիան և պատերազմն անհրաժեշտ է կանգնեցնել քաղաքական միջոցներով, այսպիսի խոսակցություն եղել է նաև այլ ձևաչափերով, և դրա վերաբերյալ առաջին զեկույցը ստացել եմ ես: Այս մասին նիստի ժամանակ նշեց պաշտպանության նախկին նախարար Դավիթ Տոնոյանը՝ անդրադառնալով ԳՇ նախկին պետ Օնիկ Գասպարյանի այն հայտարարությանը, թե պատերազմն սկսվելուց հետո ԱԽ նիստում ինքը հայտարարել է, որ ՀՀ ԶՈւ-ն ունակ չէ կանգնեցնել թշնամու ագրեսիան և պատերազմն անհրաժեշտ է կանգնեցնել քաղաքական միջոցներով:

«Ինձ դուր գար, թե ոչ, մենք պարտավոր էինք վարչապետին և Անվտանգության խորհրդին ներկայացնել այդ մոտեցումը, քանի որ դրա հիմնական պատճառն այն էր, որ կար երրորդ կողմի անմիջական ներգրավածություն, որը մեր համար անմիջական տեսանելի էր: Երրրորդ կողմը, կարծում եմ, հասկանում եք, որ Թուրքիան է»- նշեց պաշտպանության նախկին նախարարը:

Տոնոյանը ուշադրություն հրավիրեց այն հանգամանքի վրա, որ Թուրքիայի ներգրավվածությունն իրականացվում էր, ոչ թե նախիջևանյան ուղղությամբ, ոչ թե Հայաստանի սահմանի ուղղությամբ, այլ այսպես ասած ձիու քայլով՝ արցախյան թատերաբեմում։
«Այսպիսի հաշվարկ մեր կողմից չի եղել, թերի է եղել, մենք չէինք հաշվարկել այդպիսի բան, որ Թուրքիայի ԶՈւ-ն անմիջապես կարող է հայտնվել արցախյան թատերաբեմից ընդամենը 45 կմ, 25 կմ հեռավորության վրա՝ իրականացնելով թռիչքներ»,- ընդգծեց Տոնոյանը՝ հավելելով, որ անհանգստացել են պատերազմում Թուրքիայի հնարավոր ներգրավվածությամբ։

Մանրամասները՝ տեսանյութում։