«Բոլոր գիտնականները, որոնք զբաղվում են «Զորաց քարերով», շատ ուժեղ ամբիցիաներ ունեն». ապաքաղաքական զրույց Արեգ Միքայելյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է Բյուրականի աստղադիտարանի տնօրեն Արեգ Միքայելյանը: Նրա կարծիքով՝ խորհրդային կայսրության առկայությունը, անշուշտ, հաճախ նպաստում էր գիտության մեջ տաղանդների առաջխաղացմանը: Սակայն եթե խոսքն այնպիսի հանճարների մասին է, ինչպիսին էր Վիկտոր Համբարձումյանը, ապա նման անհատներ գիտության պատմության մեջ ծնվում են շատ հազվադեպ․ նրանք, կարելի է ասել, ժամանակից դուրս են:

Անդրադառնալով «Զորաց քարերի» (Քարահունջի) հետ կապված խնդրին՝ հաղորդման հյուրը կարծիք է հայտնել, որ այդ խնդրի շուրջ կարծիքները խիստ ծայրահեղացված են, և այդ հարցն ուսումնասիրող գիտնականներն անհարկի ամբիցիաների մեջ են ընկնում: Իրականում, ըստ աստղագետի, այդ վայրը հնարավոր չէ ժամանակակից իմաստով «աստղադիտական» անվանել: Մյուս կողմից, այդ պատմական հուշարձանի առկայությունը խոսում է հնագույն շրջանում՝ հազարամյակներ առաջ հայերի ունեցած բարձր քաղաքակրթության մասին: Ըստ գիտնականի՝ այդ կառույցի հիմնական նպատակն էր օրացույցի ստեղծումը: Նա համոզված է, որ նման հսկայածավալ աշխատանք կարող էր իրականացվել միայն պետության պատվերով: Հետևաբար, մեր ժողովուրդն այն ժամանակ արդեն ուներ պետականություն:

Գիտությունը հաճախ է դառնում տարբեր շահարկումների և արհեստական սենսացիաների առարկա: Այդ առումով հաղորդման հյուրն ուշադրություն է դարձնում աստղաբանության և աստղագուշակության վրա, որոնք այսօր գիտության հետ որևէ կապ չունեն՝ չնայած ուշ միջնադարում առնչվում էին աստղագիտությանը: Աստղերի միջոցով կանխատեսել մարդու բնավորությունը կամ ապագան, իհարկե, հնարավոր չէ, սակայն փաստ է նաև, որ Արեգակն ու Լուսինը կարող են ազդեցություն ունենալ որոշ մարդկանց առողջության վրա, և այդ ազդեցությունները պետք է ուսումնասիրել:

Մանրամասները՝ տեսանյութում:

Արամ Աբրահամյան