16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Հայաստանում առաջին անգամ ամենաբարձր պաշտոնատար անձինք են հարցաքննվելու․«Մարտի 1-ի» զոհերի ծնողները հուսով են, որ մեղավորներն, ի վերջո, կպատժվեն․ ՏԵՍԱՆՅՈՒԹ
Հասարակություն
10.07.2018 | 19:09
Հեղափոխությունից հետո, ի թիվս այլ չբացահայտված հանցագործությունների, հանրային ուշադրության կենտրոնում է «Մարտի 1-ի» բացահայտումը։ Արյունալի այդ էջը, որը, դեռևս, տասը տարի առաջ բարձրաստիճան պաշտոնյաները հայտարարում էին փակված, այսօր կրկին բաց է և, կարծես թե, կա քաղաքական կամք՝ այն բացահայտելու։ Համենայն դեպս՝ Հատուկ քննչական ծառայությունը կոնկրետ քայլեր է սկսել․արդեն իսկ հարցաքննվել է Պաշտպանության նախկին նախարար Սեյրան Օհանյանը, ով 2008-ին զբաղեցնում էր ՀՀ ԶՈՒ գլխավոր շտաբի պետի պաշտոնը, իսկ 2008թ -ին Պաշտպանության նախարարի պաշտոնը զբաղեցնող Միքայել Հարությունյանի նկատմամբ հայտարարվել է հետախուզում։
Ամենաաղմկահարույցը, սակայն, ՀՀ երկրորդ նախագահ, 2008թ․ մարտի 1-ին գերագույն գլխավոր հրամանատարի գործառույթներն իրականացնող Ռոբերտ Քոչարյանին հարցաքննության հրավիրելու փաստն է․ մի բան, որի անհրաժեշտությունը տասը տարի շարունակ պնդել են թե՛ ընդդիմադիրները, թե՛ «Մարտի 1-ի» փաստահավաք խմբի անդամները, թե՛ իրավապաշտպանները։
Ընդհանրապես՝ Հայաստանի երեք նախագահների հարցաքննության անհրաժեշտության մասին շատ է խոսվել, արդյոք դա տեղի կունենա, և արդյոք, ի վերջո, կբացահայտվի, թե ում հրամանով և ում կատարմամբ է տեղի ունեցել «Մարտի 1-ի» սպանդը։ Դեպքից 10 տարի անց զոհերի հարազատները հավատում են, որ գործը, վերջապես, կբացահայտվի և մեղավորները կպատժվեն:
Գոռ Քլոյանի հայրը՝ Սարգիս Քլոյանը, պատմում է, որ երկար են սպասել այս օրվան: Այն, որ Պաշտպանության նախկին նախարար Միքայել Հարությունյանին մեղադրանք է առաջադրվել, իսկ Ռոբերտ Քոչարյանը հրավիրվել է հարցաքննության, Քլոյանի գնահատմամբ՝ արդեն խոստումնալից է։ «Մարտի 1-ի» զոհերի ծնողները կարծում են, որ, եթե չլիներ տասը տարի առաջվա համազգային շարժումը, այսօրվա իշխանափոխությունը ևս կարող էր չլինել։
Արմեն Ֆարմանյանի հայրը՝ Վաչագան Ֆարմանյանը, ևս մեծ հույսեր է կապում իշխանափոխության հետ, սակայն, վերջինիս համար անհասկանալի է քննիչների կողմից իրեն ուղղված հարցերի շարանը, որոնց, դեռևս, 2008 թվականին է պատասխանել:
Իրավապաշտպան Արթուր Սաքունցը կարծում է, որ «Մարտի 1-ի» գործի հետ կապված առաջիկայում լուրջ բացահայտումներ են լինելու։
Մանրամասները՝ տեսանյութում։
