Կանադան ապասառեցրել է ԱԹՍ-ների մասերի արտահանման հարցով Թուրքիայի հետ բանակցությունները

Կանադան ապասառեցրել է Թուրքիայի հետ անօդաչու թռչող սարքերի մասերի արտահանման հսկողության բանակցություններն այն բանից հետո, երբ Անկարան համաձայնեց ՆԱՏՕ-ին Շվեդիայի անդամակցության հայտի վավերացմանը: Այս մասին Reuters-ին հայտնել է բանակցություններին ծանոթ աղբյուրը՝ նշելով, որ սա դիտարկվել է որպես  զիջում Թուրքիային։

Էրդողանի կանաչ լույսը, որը վերջ դրեց Շվեդիայի անդամակցության հարցում ավելի քան մեկ տարի ընդդիմանալու քաղաքականությանը, անակնկալ էր նույնիսկ դաշնակիցների համար։

Թուրքիայի պաշտպանական արդյունաբերության համար պոտենցիալ նշանակալի քայլ է, որ ՆԱՏՕ-ի անդամ Կանադան համաձայնել է վերսկսել անօդաչու թռչող սարքերի մասերի, այդ թվում՝ օպտիկական սարքավորումների արտահանման հսկողության վերացման շուրջ բանակցությունները, անունանության պայմանով ասել է աղբյուրը։

Հիշեցնենք, որ Կանադան դադարեցրել է անօդաչու թռչող սարքերի որոշ տեխնոլոգիաների արտահանումը Թուրքիային 2020 թվականին, երբ Արցախյան 44-օրյա պատերազմում Ադրբեջանն օգտագործում էր թուրքական «Բայրաքթար» անօդաչուները։

Կանադայի վարչապետ Ջասթին Թրյուդոյի գրասենյակի հաղորդագրության մեջ ասվում է, որ արտահանման հսկողությունները, որոնք «սահմանվել են կարևոր պատճառներով», մնում են ուժի մեջ:

Աղբյուրը նշել է, որ ՆԱՏՕ-ի գագաթնաժողովից առաջ Թուրքիան, Վաշինգտոնի հետ բանակցություններում արդեն իսկ երաշխիքներ փնտրելով F-16-ների վերաբերյալ, խնդրել է, որ Կանադայի արտահանման վերահսկողությունը նույնպես ներառվի վերջնական քննարկումներում։ Թուրքիայի ցանկացել է փաթեթային գործարք։

Կանադան համաձայնել է վերսկսել այդ հարցի շուրջ բանակցությունները, որոնք սառեցվել էին, քանի որ Թուրքիան ի սկզբանե դեմ էր անցյալ տարի ՆԱՏՕ-ին անդամակցելու Շվեդիայի և Ֆինլանդիայի հայտերին՝ պայմանով, որ Թուրքիան պարտավորվի վավերացնել Շվեդիայի հայտը Վիլնյուսում։

Հարցին՝ արդյո՞ք Թուրքիան բանակցություններ է վարում Կանադայի հետ արտահանման սահմանափակումները վերացնելու համար, Թուրքիայի Պաշտպանության նախարարության պաշտոնյան ասել է, որ անընդունելի է ՆԱՏՕ-ի դաշնակիցների կողմից արտահանման սահմանափակումներ կիրառելը միմյանց նկատմամբ, և նշել, որ «որոշակի առաջընթաց է գրանցվել Վիլնյուսի գագաթնաժողովում այդ հարցում»:

Էմմա Չոբանյան