«Դրսում ավելի մատչելի է»․ որոնք են ՀՀ քաղաքացիների համար հանգստի նախընտրելի ուղղությունները․ ՏԵՍԱՆՅՈՒԹ

Այս տարվա առաջին կիսամյակում Հայաստան ժամանած զբոսաշրջիկների թիվը հասել է մեկ միլիոն հինգ հազարի, որը 2019-ի նույն ժամանակահատվածի համեմատ աճել է 30 տոկոսով։ Զբոսաշրջիկների զգալի մասը՝ 52 տոկոսը, եկել է Ռուսաստանից, որին հաջորդում են հարևան Վրաստանը՝ 11 և Իրանը՝ 6 տոկոսով։ Իսկ ինչպիսին են հայ զբոսաշրջիկների նախասիրությունները, որտեղ  են նրանք նախընտրում անցկացնել հանգիստը։

Factor TV-ն քաղաքացիների շրջանում հարցման ընթացքում փորձեց պարզել նաև, թե որքան գումար է տրամադրում նախընտրած վայրերում հանգիստը կազմակերպելու համար։

Տուրիստական կազմակերպություններից մեկի աշխատակիցը մեզ հետ զրույցում նշեց, որ այս սեզոնին քաղաքացիների նախընտրելի ուղղություններից են Եգիպտոսն ու Կիպրոսը, իսկ եվրոպական երկրներից՝ Իսպանիան, Իտալիան, Հունաստանը: Ըստ տուրիստական գործակալության փաթեթների՝ մեկ շաբաթյա ուղևորության արժեքը դեպի Եգիպտոս սկսվում է 700 դոլարից, դեպի Կիպրոս` 1000-ից 1500 եվրոյից։ Եվրոպական երկրներից Հունաստանում մեկշաբաթյա հանգստի համար քաղաքացիները պետք է վճարեն նվազագույնը 1000 եվրո։

Հայաստանում հանգիստը կազմակերպելու համար քաղաքացիներն առավել հաճախ օգտվում են սոցփաթեթներից կամ իրենք են կազմակերպում հանգիստը: Զբոսաշրջության կոմիտեի տվյալների համաձայն՝ այս տարվա առաջին կիսամյակում շուրջ 6000 պայմանագրից 3500-ի դեպքում հանգիստը կազմակերպվել է Կոտայքի մարզում, 1000-ը՝ Տավուշում, 600-ը՝ Լոռիում, 150-ը՝ Վայոց Ձորում։

Դեռևս հայտնի չեն տարվա առաջին կիսամյակում ներքին զբոսաշրջության ցուցանիշները, սակայն Վիճակագրական կոմիտեի վերջին հրապարակումներում առաջին եռամսյակի տվյալներն արդեն ամփոփված են։

Դրանց համաձայն՝ Հայաստանում 2023 թվականի հունվար-մարտ ամիսներին ներքին զբոսաշրջության ցուցանիշը, նախորդ տարվա նույն ժամանակահատվածի համեմատ, աճել է 25․6 տոկոսով։ Այս տարվա առաջին եռամսյակում հանգստի և ժամանցի նպատակով մեր երկրի ավելի քան 170,000 քաղաքացի ճամփորդել է Հայաստանում, նախորդ տարվա համեմատ՝ 22․6 տոկոսով ավելի։ Նույն ժամանակահատվածում զբոսաշրջության նպատակով  Հայաստանից մեկնողների թիվը, նախորդ տարվա համեմատ, աճել է 2,3 անգամ՝ 143,308-ի փոխարեն կազմելով 327,141 քաղաքացի։ Դեպի արտերկիր ուղևորությունների մեծ մասը քաղաքացիները կազմակերպել են ինքնուրույն։

Տուրիստական գործակալության տնօրեն Մարինա Ավետիսյանի խոսքով՝ օրական սպասարկում են 200-ից 300 հաճախորդի, ովքեր ընտրում են իրենց ճամփորդության փաթեթները, իսկ ամեն օր իրենց դիմած 100-ից ավելի քաղաքացի արտերկիր է ճամփորդում:

Զբոսաշրջության կոմիտեի հանրային կապերի ղեկավար Աննա Մարգարյանը նշում է՝ ոլորտը զարգացնելու համար շարունակում են առաջնային մնալ ենթակառուցվածքների բարելավման խնդիրները։ Համաշխարհային բանկի հետ համագործակցությամբ իրականացվում է ենթակառուցվածքների բարելավմանն ուղղված շուրջ 40 ծրագիր: Մինչև հիմա իրականացվել է 15 ծրագիր, մնացածը նախատեսվում է իրականացնել 2024 թվականին: Ծրագրերն իրականացվում են Սյունիքի, Լոռու, Գեզարքունիքի, Արարատի և Կոտայքի մարզերում։

Նշենք, որ Հայաստանում նվազագույն աշխատավարձը 75 հազար դրամ է, միջին ամսական անվանական աշխատավարձը, մայիսի դրությամբ, 256 հազար դրամ: Մեկշաբաթյա հանգստի համար Հայաստանի մարզերում առաջարկվող  հյուրանոցների միջինացված արժեքները սկսվում են նվազագույնը 250 հազար դրամից, այսինքն՝ 3 անգամ բարձր նվազագույն աշխատավարձից և գրեթե հավասար միջին ամսական անվանական աշխատավարձին:

Մանրամասները՝ տեսանյութում։

Անի Թամրազյան