15.01.2026 | 22:37
ՀՀ տարածքում կան փակ ավտոճանապարհներ
Այն հանդարտությունը, որ կա ՀՀ-ում և սփյուռքում արցախցիների ճակատագրի վերաբերյալ, անընդունելի է. ԱՀ ՄԻՊ․ ՏԵՍԱՆՅՈՒԹ
Հասարակություն
06.07.2023 | 12:06
ՀՀ տարբեր խորհրդարանականների կողմից արվող քաղաքական հայտարարությունները, որոնցով ճանաչում են Ադրբեջանի տարածքային ամբողջականությունը` Արցախը ներառյալ, որոշակի խոչընդոտներ են հարուցում։ Այսօր Ստեփանակերտ – Երևան հեռուստակամուրջի ժամանակ հայտարարեց Արցախի ՄԻՊ Գեղամ Ստեփանյանը։
Նրա խոսքով` տարբեր քննարկումների ժամանակ միջազգային գործընկերների հետ շփումների ժամանակ նրանք ևս հաճախ վկայակոչում են հենց այդ հայտարարությունները։
«Ես կարող եմ անվերապահորեն ասել, որ ցանկալի կլիներ` Հայաստանի Հանրապետության հանրային իշխանությունը ներկայացնող մարմինների կողմից նման հայտարարություններ չհնչեն, որոնք վնասում են ընդհանուր գործին։ Պետք է ձեռնպահ մնալ այնպիսի հայտարարություններից, որոնք չեն բխում Արցախի ժողովրդի շահերից և կասկածի տակ են դնում Արցախի ժողովրդի ինքնորոշման իրավունքը, որը մեր պարագայում, ակնհայտ է, որ հավասարազոր է Արցախի ժողովրդի կյանքի իրավունքին»,- նշեց Ստեփանյանը։
Նրա խոսքով՝ իրավիճակի լրջությունը և այն սպառնալիքը, որ կախված է Արցախի ժողովրդի գլխին, նույնիսկ հայաստանյան հասարակության մեջ ամբողջական չի ընկալվել։
«Այն հանդարտությունը, որ կա Հայաստանում, երբեմն նաև սփյուռքում՝ Արցախի ժողովրդի ճակատագրի վերաբերյալ, ինձ համար անընդունելի է», – ասաց Արցախի ՄԻՊ-ը։
Մանրամասները՝ տեսանյութում։
