06.06.2026 | 19:05
Բիթքոյնը կորցնում է գրավչությունը․ ներդրողները նախընտրում են AI ընկերություններն ու խոշոր IPO-ները
Վրաստանը չի պատրաստվում վերադառնալ օտարերկրյա գործակալների մասին օրենքին
Քաղաքականություն
21.06.2023 | 17:07
Վրաստանի իշխող «Վրացական երազանք-Ժողովրդավարական Վրաստան» կուսակցությունը մտադիր չէ հետագայում ևս օտարերկրյա գործակալների մասին օրինագիծ նախաձեռնել, որի ընդունումից որոշվել էր հրաժարվել մարտին։ Այս մասին լրագրողներին հայտնել է Վրաստանի վարչապետ Իրակլի Ղարիբաշվիլին, գրում է ՏԱՍՍ-ը։
«Այդ հարցը, ի դեպ, քննարկվել է մեր եվրոպացի և ամերիկացի ընկերների շրջանում, ես մեր թիմի անունից հստակ հաստատել եմ մեր դիրքորոշումը, որ «Վրացական երազանքը» չի պատրաստվում վերադառնալ օտարերկրյա գործակալների մասին օրենքին։ Այս հարցը փակված է, մենք դրան չենք վերադառնա»,- ասել է Ղարիբաշվիլին։
Մարտի 7-ին և 8-ին Թբիլիսիում հազարավոր բողոքի ակցիաներ են տեղի ունեցել այն բանից հետո, երբ խորհրդարանն առաջին ընթերցմամբ ընդունել է օտարերկրյա գործակալների մասին օրինագծի վրացական տարբերակը։
Հանրահավաքների ժամանակ ոստիկանությունը ջրցան մեքենաներ և արցունքաբեր գազ է կիրառել։ Բողոքի երկու օրերի ընթացքում ավելի քան 130 մարդ բերման է ենթարկվել։ Մարտի 9-ի առավոտյան մայրաքաղաքում բողոքի ցույցերից հետո իշխող «Վրացական երազանք-Ժողովրդավարական Վրաստան» կուսակցությունը որոշեց հետ կանչել օրինագիծը, իսկ մարտի 10-ին պատգամավորները դեմ քվեարկեցին նախաձեռնությանը։
Տաթև Ֆռանգյան
