Հասարակություն
20.06.2023 | 18:53
Մարդու իրավունքների եվրոպական դատարանը հերթական վճիռն է կայացրել ՀՀ-ի դեմ, այս անգամ բավարարելով «Սիմոնյանը և Ենգիբարյանն ընդդեմ Հայաստանի» հայցը։ Ստրասբուրգյան դատարանն արձանագրել է, որ 12 տարի առաջ խախտվել է ոստիկանների կողմից սպանված Արման Ենգիբարյանի կյանքի իրավունքը, իսկ ներպետական ատյաններում գործի քննության ընթացքում տեղի են ունեցել ընթացակարգային և առարկայական կողմերի խախտումներ:
2011 թվականի հունիսի 14-ին Երևանի մետրոպոլիտենի «Գարեգին Նժդեհ» կայարանի մոտ ոստիկանները սպանել էին Արման Ենգիբարյանին` ըստ պաշտոնական վարկածի` «նախազգուշացնող կրակոցից հետո վնասազերծելով» նրան` որովայնին ու գլխին կրակելով:
Մինչև շտապօգնության գալը որևէ մեկը չի փորձել Արման Ենգիբարյանին առաջին օգնություն ցուցաբերել և նրա մարմինը արնահոսելով մնացել է հատակին ընկած այնքան ժամանակ, մինչև շտապօգնության աշխատակիցները ժամանել են դեպքի վայր և Ենգիբարյանին անգիտակից վիճակում տեղափոխել «Էրեբունի» բժշկական կենտրոն, որտեղ էլ գիտակցության չգալով, վիրահատություն սկսելուց քիչ անց մահացել է:
2011 թվականի հունիսի 14-ին ՀՀ ոստիկանության ՔԳՎ ՀԿԳ քննության վարչությունում հարուցվել է քրեական գործ, սակայն գործի վարույթը կարճվել է. քննության ընթացքում պարզվել է, որ ոստիկանության ծառայողի գործողությունները օրինական են եղել։ Նույն թվականի սեպտեմբերի 30-ին սպանվածի հոր՝ Սերգեյ Ենգիբարյանի ներկայացուցիչ փաստաբան` Էդմոն Մարուքյանի կողմից բողոք է ներկայացվել դատարան` ՀՀ հատուկ քննչական ծառայության ՀԿԳ քննիչ Գ. Գևորգյանի` քրեական հետապնդում չիրականացնելու մասին որոշման դեմ:
Ըստ սպանվածի հոր՝ իր որդուն ոստիկանները սպանել են, իսկ գործողություններն էլ օրինաչափ չեն եղել: Արմանի երկու երեխաներն էլ մնացել են առանց հայրական խնամքի:
2011 թվականի նոյեմբերի 2-ին Հայաստանի Հանրապետության Երևանի Կենտրոն և Նորք Մարաշ վարչական շրջանների ընդհանուր իրավասության դատարանը որոշում է կայացրել` բողոքը մերժել: Օրեր անց դատարանի որոշումը բողոքարկվել է Վերաքննիչ քրեական դատարան, որը մերժվել է: Այս անգամ այն բողոքարկվել է Վճռաբեկ դատարան, որը բողոքը վերադարձնելու մասին որոշում է կայացրել: Եռաստիճան դատական համակարգը սպառելուց հետո տուժող կողմը դիմել է ՄԻԵԴ։
Մի շարք խախտումներ ներկայացնելուց բացի, տուժող կողմը մատնանշել է նաև նախաքննության մարմնի կողմից թույլ տրված խախտումները։ Մասնավորապես, ոստիկանները հարցաքննվել են դեպքից մեկ օր անց և այդ ընթացքում ոչինչ չի ձեռնարկվել նրանց միմյանցից մեկուսի պահելու համար.
«Նշված հանգամանքն ապացուցվում է նրանով որ ոստիկանները գրեթե իրարից չտարբերվող ցուցմունք են տվել, ինչը վկայում է այն մասին, որ ոստիկանները գաղտնի համաձայնության են եկել միմյանց հետ։ Միայն այն փաստը, որ չեն ձեռնարկվել նման համաձայնության վտանգի նվազեցմանն ուղղված համապատասխան քայլեր, հանդիսանում է նախաքննության պատշաճության էական թերություն»,- նշված է եղել ՄԻԵԴ դիմումում։
Դիմում ներկայացնելուց 11 տարի անց ՄԻԵԴ-ն արձանագրել է, որ ՀՀ-ն խախտել է Արման Ենգիբարյանի կյանքի իրավունքը՝ երաշխավորված Մարդու իրավունքների Եվրոպական Կոնվենցիայի 2-րդ հոդվածով և պարտավորեցրել է Հայաստանին Ենգիբարյանի ընտանիքին վճարել 39.000 եվրո փոխհատուցում։
Ռոզա Վարդանյան
