Օվերչուկը պարզաբանել է, թե որն է ճանապարհների ապաշրջափակման գլխավոր տարաձայնությունը

ՌԴ փոխվարչապետ Ալեքսեյ Օվերչուկը Սանկտ Պետերբուրգի միջազգային տնտեսական ֆորումի  շրջանակներում ՏԱՍՍ-ին տված հարցազրույցում անդրադարձել է Հայաստանի ու Ադրբեջանի միջև տրանսպորտային հաղորդակցության ապաշրջափակման առկա խոչընդոտներին։ Նա նշել է, որ Հայաստանի ու Ադրբեջանի նորագույն պատմության ընթացքում «կապեր չեն եղել, պատերազմ է ընթացել, որը դադարեցվել է ՌԴ նախագահ Վլադիմիր Պուտինի միջնորդությամբ»։

«Սակայն մինչ օրս երկու երկրների սահմանին տեղի են ունենում զինված բախումեր ու մարդիկ են մահանում։ Իհարկե, նման իրավիճակում իմ գործընկերներին հեշտ չէ, նրանք զգում են իրենց պատմական պատասխանատվությունը այն որոշման համար, որը մեր պետությունների ղեկավարները վստահել են մեզ զարգացնել և շարունակում են աշխատել տրանսպորտային հաղորդակցությունների ապաշրջափակման ուղղությամբ»,-ասել է ՌԴ փոխվարչապետը՝ հավելելով, որ աշխարհում դժվար է գտնել օրինակներ, երբ պատերազմող կողմերը նստել են բանակցությունների սեղանի շուրջ և սկսել խոսել տրանսպորտային կապերի վերականգնման մասին՝ ռազմական գործողությունների դադարեցումից գրեթե անմիջապես հետո։

«Մեր դեպքում բոլորը հասկանում են, որ Ադրբեջանի և Հայաստանի միջև խաղաղությունն այլընտրանք չունի, և խաղաղության հասնելու լավագույն միջոցը մարդկանց համար խաղաղ փոխգործակցության հնարավորություն բացելն է, ընդհանուր ճանապարհ կառուցելը,որով կանցնեն մարդիկ ու բեռները, կսկսվի նորմալ կյանք և հին վերքերը աստիճանաբաև կմղվեն երկորդ պլան»,-ասել է Օվերչուկը՝ ընդգծելով, որ ամենամեծ խնդիրը վստահությունն է։

«Հենց դրա պատճառով է, որ բանակցությունները դանդաղ են ընթանում։ Ի վերջո, ճանապարհով կգնան հասարակ մարդիկ՝ ադրբեջանցիներ, հայեր, այլ երկրների քաղաքացիներ։ Ինչպես են նրանք փոխազդելու միմյանց հետ սահմանը հատելիս, ինչպես է ապահովվելու նրանց անվտանգությունը այլ պետության տարածքով շարժվելիս։ Սա է այսօր գլխավոր հարցը, որին մենք միասին ցանկանում ենք պատասխանել այնպես, որ վստահ լինենք, որ այլ երկրի տարածքում այս մարդկանց հետ ոչ մի վատ բան չի պատահի։ Եվ իհարկե, բոլորիս վրա ազդում է այն, ինչ հիմա կատարվում է սահմանին։ Շատ ավելի հեշտ կլիներ լուծումներ գտնել, եթե կրակոցները դադարեցվեին։ Այդ պատճառով կողմերը դադարներ են վերցնում, փորձագետներին ներգրավում, ցանկացած առաջարկ և որոշում ենթարկում են շատ մանրակրկիտ և ստուգված վերլուծության, որպեսզի ամեն ինչ իսկապես աշխատի այնպես, ինչպես պետք է լինի այն երկրների միջև, որոնք, հուսանք, թևակոխում են հարաբերությունների նոր՝ խաղաղ, փուլ»։

Նա նշել է, որ փաստաթղթի նախագիծը ձևավորված է ու գրեթե ամբողջովին պատրաստ համաձայնեցված իրենց մակարդակով, սակայն դեռ կա գլխավոր հարցը, թե ինչպես են հայերն ու ադրբեջանցիները միմյանց հետ շփվելու սահմանը հատելիս։

Օվերչուկը նաև ասել է, որ Եվրասիական միջկառավարական խորհրդի ժամանակ պայմանավորվել են  ՀՀ վարչապետ Նիկոլ Փաշինյանի հետ այդ հարցերը քննարկել։

«Նա շատ մանրամասն անդրադարձավ եռակողմ խմբի հանդիպումից հետո մնացած բոլոր հարցերին։ Շատ բան հստակեցված է, և ինչ-որ բան դեռ մնում է և պահանջում է հետագա քննարկում ադրբեջանական կողմի հետ»,- ասել է ՌԴ փոխվարչապետը՝ հավելելով, որ ոչ ոք չի կարող հստակ պատասխանել, թե երբ կլինի ապաշրջափակումը։

«Երբ կպայմանավորվենք, և երբ կստորագրվի համապատասխան փաստաթուղթը։ Այդ ժամանակ արդեն հնարավոր կլինի խոսել այս երկաթուղու վերականգնման մասին, որը կար խորհրդային տարիներին և շահագործվում էր և՛ հայերի, և՛ ադրբեջանցիների կողմից»,- ասել է Օվերչուկը։

Նա նշել է, որ Հայաստանի համար երկաթուղու բացումն ունի առանցքային նշանակություն երկրի ապաշրջափակման տեսակետից։