Այնտեղ կանգնած ռուս խաղաղապահը արցախցիների անվտանգության երաշխավորն է. Հայկ Մամիջանյան․ ՏԵՍԱՆՅՈՒԹ

Արցախում գտնվող հայրենակիցների ֆիզիկական անվտանգության երաշխավորը ռուս խաղաղապահն է։ Այսօր խորհրդարանական ճեպազրույցի ընթացքում հայտարարեց ԱԺ «Պատիվ ունեմ» խմբակցության ղեկավար Հայկ Մամիջանյանը` հավելելով, որ այդ հանգամանքը հաշվի առնելով միշտ չէ, որ ՀՀ ԱԺ պատգամավորը կարող է տալ այնպիսի գնահատականներ, որոնք կցանկանար։

Մեկնաբանելով հունիսի 15-ին Հակարիի կամրջի մոտ ադրբեջանական դրոշ բարձրացնելու փորձը՝ խաղաղապահների ներկայությամբ՝ Մամիջանյանը նշեց․ «Ես գիտեմ, թե ինչպես պետք է խոսի ՀՀ Ազգային ժողովի պատգամավորը։ Սովոր եմ անվտանգության երաշխիքները համեմատության մեջ դնել իրականի, այլ ոչ թե երազելիի հետ»։

Ընդդիմադիր պատգամավորի խոսքով՝ իշխանական խմբակցությունների ներկայացուցիչների նպատակն է իրենց այս կամ այն օտարերկրյա տերերին հաճոյանալը, մինչդեռ ինքը նման նպատակ չունի։
«Եթե ավելի կոնկրետ պատասխան եք ակնկալում, թե արդյոք ես 100 տոկոսով գոհ եմ մեր ռազմավարական դաշնակցի, մեր անվտանգության հովանոցի գործելաոճից, ապա ինչպես և ցանկացած ՀՀ քաղաքացի, իհարկե, ո՛չ, բայց, իհարկե, գիտակցում եմ, որ այս պահին այնտեղ կանգնած ռուս խաղաղապահն իմ քույրերի և եղբայրների անվտանգության երաշխավորն է, որովհետև Նիկոլ Փաշինյանը ձեռքերը լվացել է Արցախից»,– նշեց պատգամավորը։

Հիշեցնենք, որ հունիսի 15-ին՝ ժամը 08:40-ի սահմաններում, Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ էին կատարել՝ ՀՀ տարածքում դրոշ տեղադրելու նպատակով: Հայկական կողմի ձեռնարկած միջոցների արդյունքում ադրբեջանցի զինծառայողների առաջխաղացման և ՀՀ տարածքում դրոշ տեղադրելու փորձը կանխվել էր:

Մանրամասները՝ տեսանյութում։