Ակտիվիստների խումբը պնդում է՝ արհեստական բանականությունը վտանգավոր է մարդկության համար

Բրյուսելում գործող PauseAI խումբը կարծում է, որ արհեստական բանականությունը (AI) վտանգավոր է: Ակտիվիստները փորձում են համոզել Եվրամիությանը դադարեցնել արհեստական բանականության ավելի հզոր համակարգերի տեղակայումը, գրում է Euronews-ը։

Վերջին ամիսներին նոր գործիքները, ինչպիսիք են ChatGPT-ը, մտավախություն են առաջացրել, որ արհեստական բանականությունը միլիոնավոր մարդկանց կզրկի աշխատանքից կամ կտարածի ապատեղեկատվություն, հատկապես ընտրությունների շրջանում։

PauseAI-ի հիմնադրի խոսքով՝ այս հզոր համակարգերը շատ շուտով կկարողանան խորամանկել և նույնիսկ  մանիպուլացնել մարդկանց։ Եվ եթե մարդիկ փորձեն միջամտել կամ անջատել այդ տեխնոլոգիաները, դրանք կարող են դիմակայել: Ժամանակի ընթացքում ընկերությունները պատրաստ կլինեն AI համակարգերին տալ ավելի մեծ ինքնավարություն և միացնել դրանք կենսական ենթակառուցվածքներին, ինչպիսիք են էլեկտրացանցերը, կամ տալ դրանց զենքի հասանելիություն: Այդ իսկ պատճառով PauseAI խմբի հիմնադիրը ԵՄ-ին խնդրում է նաև միջազգային գագաթնաժողով անցկացնել այս հարցով։

«Առաջինը, ինչ պետք է անել, որևէ կառավարությանը պետք է կոչ անել՝ հանդես գալ գագաթնաժողովի կազմակերպմամբ, մորատորիում մտցնել, դադարեցնել այդ վտանգավոր համակարգերի զարգացումը։ Դա պետք է անել միջազգային մակարդակով, քանի որ եթե անեք ազգային մակարդակով, դրա դեմ շատ փաստարկներ կլինեն։ Երկրները մրցակցում են ճիշտ այնպես, ինչպես ընկերությունները: Մենք չենք կարող պարզապես քաղաքավարությամբ խնդրել ընկերություններին դադարեցնել AI-ի զարգացումը, քանի որ նրանց վրա մեծ մրցակցային ճնշում կա: Նույնը տեղի է ունենում նաև ազգային մակարդակում։ Այդ պատճառով դա պետք է անել միջազգային մակարդակով»,- ասել է ընկերության հիմնադիր Յուպ Մեյնդերտման։

PauseAI-ը միակը չէ, որն ահազանգում է այս մասին։ Հունիսին Մեծ Բրիտանիայի վարչապետ Ռիշի Սունակը դարձավ աշխարհի առաջին առաջնորդներից մեկը, որն առանց համապատասխան նախազգուշական միջոցների ճանաչեց «գերխելացի» արհեստական ​​բանականության զարգացման հնարավոր «էկզիստենցիալ» սպառնալիքը: Ի դեպ, Սունակը նաև հայտարարել է, որ Բրիտանիայում համաշխարհային գագաթնաժողով է անցկացվելու AI-ի թեմայով։

Հավելենք, որ վերջերս էլ հարյուրավոր հետազոտողներ և տեխնոլոգիական ընկերությունների ղեկավարներ բաց նամակ էին ստորագրել՝ նախազգուշացնելով, որ արհեստական​ բանականությունը մի օր կարող է ոչնչացնել մարդկությանը: Որոշներն էլ, սակայն, պնդում են, որ այն դեռ չափազանց թերզարգացած է կենսական սպառնալիք ներկայացնելու համար։

Էմմա Չոբանյան