Ալիևը Բաքվում Պուտինի օգնականի հետ քննարկել է Ադրբեջանի տարածքով տրանսպորտային միջանցքների օգտագործումը

Ադրբեջանի նախագահ Իլհամ Ալիևն այսօր Բաքվում ընդունել է ՌԴ նախագահ Վլադիմիր Պուտինի օգնական Իգոր Լևիտինին և քննարկել տրանսպորտային ոլորտում համագործակցության հարցեր։

Ադրբեջանի նախագահականի հաղորդագրության մեջ ասվում է, որ հանդիպմանը քննարկվել են, այսպես կոչված,  «Զանգեզուրի միջանցքի» ներուժը «Ռուսաստանի կողմից ապագայում օգտագործելու հնարավորությունների ուսումնասիրման հետ կապված հարցեր»։

Բացի այդ, զրույցի ընթացքում մտքերի փոխանակություն է տեղի ունեցել Հյուսիս-Հարավ տրանսպորտային միջանցքի զարգացման ուղղությամբ փոխադարձ ջանքերի շարունակման, բեռնափոխադրումների ծավալների ավելացման, Ադրբեջանի տարածքում համապատասխան ենթակառուցվածքների օգտագործման հնարավորությունների, Բաքու-Թբիլիսի-Կարս երկաթուղով և Հյուսիս-Հարավ տրանսպորտային միջանցքներով Ադրբեջանի տարածքով բեռնափոխադրումների շուրջ։

Հիշեցնենք, որ մայիսին Ռուսաստանի Դաշնության և Իրանի նախագահներ Վլադիմիր Պուտինն ու Էբրահիմ Ռաիսին տեսակապով մասնակցել են Ռեշտ-Աստարա երկաթուղային հատվածի կառուցման մասին համաձայնագրի ստորագրման արարողությանը։ Այս նախագծի մասնակից է նաև Ադրբեջանը։

Ուկրաինայում պատերազմի մեկնարկից ի վեր ՌԴ-ն մեծ ջանքեր է գործադրում երկաթգծի կառուցումը կյանքի կոչելու համար։ Ադրբեջանը, ՌԴ-ն ու Իրանն ակտիվ բանակցություններ էին վարում, սակայն վերջին ամիսներին Թեհրանի և Բաքվի հարաբերություններում լուրջ լարվածության ֆոնին դեռևս պարզ չէ, թե նախագիծն ինչ ընթացք և ավարտ կունենա։

Էմմա Չոբանյան