Թեհրանն ու Բաքուն քննարկում են լարվածությունը կառավարելու ու վեճերը լուծելու ուղիները․ Իրանի ԱԳՆ

Իրանի ԱԳՆ մամուլի խոսնակ Նասեր Քանանին ճեպազրույցում անդրադարձել է Ադրբեջանի հետ լարված հարաբերություններին ու երկու երկրների ԱԳ նախարարների վերջին բանակցություններին, գրում է Մեհր գործակալությունը։

«Տարբեր պարբերականությամբ երկու երկրների արտգործնախարարների միջև կայացել է բանակցությունների չորս փուլ։ Բանակցությունների վերջին փուլում համաձայնեցվել են որոշ գործնական քայլեր, այդ թվում՝ երկու երկրների միջև տեխնիկական պատվիրակությունների փոխանակում՝ լարվածությունը կառավարելու և վեճերը լուծելու համար։ Երկու երկրների միջև տեղի է ունեցել պատվիրակությունների փոխանակում, և այդ բանակցություններն ամփոփելու համար կայացել է արտգործնախարարների բանակցությունների չորրորդ փուլը, և կողմերի միջև ընդհանուր փոխըմբռնում է եղել»,-ասել է Քանանին։

Հավելենք, որ Իրանի ԱԳ նախարար Հոսեյն Ամիր Աբդոլահիանն ու Ադրբեջանի ԱԳ նախարար Ջեյհուն Բայրամովը օրերս հեռախոսազրույցի ընթացքում քննարկել են երկկողմ հարաբերությունների վիճակը։ Բավականին երկար տևած զրույցի ընթացքում կողմերն ընդգծել են խնդիրների լուծման նպատակով խորհրդակցությունների շարունակման և տարբեր ոլորտներում տեխնիկական ու մասնագիտացված պատվիրակությունների փոխանակման անհրաժեշտությունը։

Թեհրանի և Բաքվի հարաբերություններում առկա լարվածությունը այդպես էլ չի նվազում։ Օրերս Ադրբեջանի ԱԳՆ-ն սեփական քաղաքացիներին հորդորել էր Իրան չայցելել։ Վերջերս էլ տեղեկություններ էին  տարածվել, որ Իրանում Ադրբեջանի քաղաքացի Ֆարիդ Սաֆարլին է ձերբակալվել լրտեսության մեղադրանքով։ Ադրբեջանում ակտիվորեն շարունակվում են կրոնական տարբեր գործիչների ձերբակալություններն Իրանի օգտին լրտեսություն կատարելու կասկածանքով։

Էմմա Չոբանյան