06.06.2026 | 13:05
Հայտնի է Հայաստանի հավաքականի հայտացուցակը Ղազախստանի դեմ խաղում․ ԼՈՒՍԱՆԿԱՐ
Կախովկա ՀԷԿ-ի ամբարտակի ավերման հետևանքով առաջացած ջրհեղեղն Ուկրաինայում առնվազն 13 մարդու կյանք է խլել
Քաղաքականություն
09.06.2023 | 20:00
Ուկրաինայում Կախովկա ՀԷԿ-ի ամբարտակի ավերման հետևանքով առաջացած ջրհեղեղից առնվազն 5 մարդ է զոհվել, ևս 13-ն անհետ կորած է համարվում։ Այս մասին հայտարարել է Ուկրաինայի ՆԳ նախարար Իգոր Կլիմենկոն, գրում է BBC-ի ռուսական ծառայությունը։
Նշվում է, որ 4 մարդ մահացել է Խերսոնի շրջանում, ևս 1-ը՝ Նիկոլաևում։
«Խերսոնի մարզում փաստացի հեղեղվել է 48 բնակավայր, որից 34-ը (3,625 տուն)՝ Ուկրաինայի կողմից վերահսկվող տարածքում, 14-ը՝ ժամանակավոր օկուպացված տարածքում»,- ասել է ՆԳՆ ղեկավարը։
Խերսոնի շրջանի օկուպացիոն իշխանությունների ղեկավար Վլադիմիր Սալդոն իր հերթին հայտնել է, որ ջրհեղեղի հետևանքով առնվազն 8 մարդ է մահացել։
Նա պնդում է, որ ռուսական իշխանությունները ջրհեղեղի գոտիներից տարհանել են ավելի քան 5,8 հազար մարդու։ Միևնույն ժամանակ, ռուսական զորքերի կողմից գրավված Դնեպրի ձախ ափին մարդիկ դժգոհում են, որ պետությունից օգնություն չկա, և զինվորականները, իբր, նույնիսկ միջամտել են կամավորների աշխատանքին։
Հիշեցնենք, որ Կախովկա ՀԷԿ-ում, որն արդեն մեկ տարուց ավելի վերահսկում են ռուս զինվորականները, հունիսի 6-ի առավոտյան պայթյունից հետո ջրի անվերահսկելի արտահոսք է տեղի ունենում, ինչի հետևանքով բազմաթիվ բնակավայրեր հեղեղվել են։ Կիևը հայտարարել է, որ ռուսական զորքերն են պայթեցրել ՀԷԿ-ի ամբարտակը։ ՌԴ-ն հերքում է՝ փոխարենը տեղի ունեցածի համար մեղադրելով ուկրաինական կողմին։
Ուկրաինայի ՆԳՆ-ի տվյալներով՝ հունիսի 8-ի երեկոյան ջրհեղեղի գոտու տարածքներից տարհանվել է 2,339 մարդ, այդ թվում՝ 120 երեխա։
Էմմա Չոբանյան
