Հայաստանն առարկություն կներկայացնի ՄԻԵԴ՝ երկու հայ զինծառայողների առևանգման փաստով

Ադրբեջանը ավելի քան 10 օր առաջ առևանգված երկու հայ զինծառայողների մասին տեղեկություն է տրամադրել Մարդու իրավունքների եվրոպական դատարանին։ Ստրասբուրգի դատարանը տեղեկատվությունն արդեն փոխանցել է հայկական կողմին։

«Մարդու իրավունքների եվրոպական դատարանից ստացել ենք Ադրբեջանի կողմից Եվրոպական դատարանին ներկայացրած երկու հայ զինծառայողների վերաբերյալ տեղեկատվություն՝ ներառյալ բժշկական փաստաթղթեր և պահման պայմանների մասին մանրամասներ»,- հայտնել է Միջազգային իրավական հարցերով ՀՀ ներկայացուցչի գրասենյակը։

Գրասենյակի խոսնակ Հասմիկ Սամվելյանը Factor.am-ի հետ զրույցում ասաց, որ հայկական կողմն այս պահին ուսումնասիրում է գերեվարված երկու հայ զինծառայողների վերաբերյալ Ադրբեջանի կողմից ՄԻԵԴ ներկայացված փաստաթղթերը։ ՄԻԵԴ-ը հայկական կողմին մինչև հունիսի 16-ը ժամանակ է տվել դիրքորոշումներ ներկայացնելու համար․ միայն դրանից հետո Եվրոպական դատարանը կարող է որոշել՝ Ադրբեջանի դեմ միջանկյալ միջոց կիրառե՞լ, թե՞ ոչ։

«Մինչև մենք կդիմեինք ՄԻԵԴ, Ադրբեջանն արդեն իսկ հաստատել էր, որ տղաներն իրենց մոտ են ու քրեական գործեր են հարուցվել։ Բժշկական փաստաթղթեր են ներկայացրել, պահման պայմանների վերաբերյալ տեղեկատվություն փոխանցել, լուսանկարներ են տրամադրել․ հիմա պիտի ուսումնասիրենք, հասկանանք՝ ինչն է տղաների իրավունքներին դեմ ու հայտնենք մեր դիրքորոշումը։ Բավականին բացթողումներ կան»,- ասաց մամուլի խոսնակը։

Հիշեցնենք՝ մարտական հենակետեր սնունդ մատակարարող երկու հայ զինծառայողների՝ Հարություն Հովագիմյանի ու Կարեն Ղազարյանի առևանգման փաստով Հայաստանը շուրջ մեկ շաբաթ առաջ էր հրատապ տարբերակով դիմել Ստրասբուրգի դատարան՝ միջանկյալ միջոց կիրառելու պահանջով։ Դատարանը հետաձգել էր որոշման կայացումը՝ միևնույն ժամանակ տեղեկատվություն պահանջելով Ադրբեջանից։ Ադրբեջանն առևանգված հայ ռազմագերիներին դիվերսանտներ է անվանում։ Հայաստանի ռազմական գերատեսչությունից ասում են՝ զինծառայողները դիվերսիոն նպատակ չէին կարող ունենալ․ նրանցից մեկին ամրակցված զենքը մեքենայում է եղել, իսկ մեքենան՝ մարտական դիրք տանող ճանապարհին, ընդ որում՝ շարժիչը գործարկված վիճակում։

Արփի Հակոբյան