Կանադայի հրդեհների պատճառով Նյու Յորքը նարնջագույն ծխով է պատվել․ ԼՈՒՍԱՆԿԱՐՆԵՐ

Կանադայի Ալբերտա (արևմուտք) և Նոր Շոտլանդիա (արևելք) նահանգներից հետո անտառային հրդեհներ են բռնկվել Քվեբեկում, որը սահմանակից է ԱՄՆ չորս նահանգներին՝ Մեյնին, Նյու Հեմփշիրին, Նյու Յորքին և Վերմոնտին, հաղորդում է Euronews-ը։

Կանադայի հրդեհներից անտառների պաշտպանության ընկերության (Sopfeu) տվյալներով՝ ներկայում գրանցվել է մինչև 140 հրդեհ, որոնցից գրեթե հարյուրը դեռ հսկողության տակ չեն կարողանում առնել։ Մինչև հաջորդ երկուշաբթի երեկոյան օդերևութաբաններն էական տեղումներ չեն կանխատեսում։

Միջազգային օգնություն է ժամանում Քվեբեկ, այդ թվում՝ մինչև 100 հրշեջներ Ֆրանսիայից՝ հրդեհաշիջման աշխատանքներին օգնելու համար։ Նահանգի իշխանությունները հույս ունեն հրդեհի դեմ պայքարողների թիվը հասցնել 1,200-ի։

«Հարյուրավոր ամերիկացի հրշեջներ հենց նոր ժամանել են Կանադա, մյուսները ճանապարհին են»,- հայտարարել է վարչապետ Ջասթին Թրյուդոն ԱՄՆ նախագահ Ջո Բայդենի հետ բանակցություններից հետո։

Կանադայի անտառային հրդեհների հետևանքով ծուխը տարածվել է նաև Միացյալ Նահանգներում։ Նյու Յորքում  Ազատության արձանը և Մանհեթենի երկնաքերերը պատվել են նարնջագույն մառախուղով, իսկ փողոցներում նորից հայտնվել են դիմակներով մարդիկ՝ ինչպես կորոնավիրուսի համաճարակի ժամանակ։

ԱՄՆ կառավարությունն այն քաղաքացիներին, որոնք ունեն առողջական խնդիրներ, կոչ է արել «նախազգուշական միջոցներ ձեռնարկել» օդի որակի կտրուկ վատթարացման պայմաններում։ Նախօրեին տեսանելիությունն այնքան վատ է եղել, որ ԱՄՆ Քաղաքացիական ավիացիայի գործակալությունը (FAA) դանդաղեցրել է օդային երթևեկությունը, որոշ ինքնաթիռներ էլ վայրէջք են կատարել այդ տարածքում:

Էմմա Չոբանյան