Ալիևի դեմ քննադատական ֆեյսբուքյան գրառման համար Ադրբեջանում ընդդիմադիր ակտիվիստի են ձերբակալել

Ադրբեջանում ընդդիմադիր ակտիվիստ Ամրահ Թահմազովին ձերբակալել են՝ նախագահ Իլհամ Ալիևին քննադատող ֆեյսբուքյան գրառման պատճառով։ Տեղական լրատվամիջոցները հայտնում են, որ Սաբայիլի շրջանային դատարանը նրա նկատմամբ 30-օրյա վարչական կալանք է կիրառել։

Նախօրեին Թահմազովը հանդիպել է իր փաստաբան Զիբեյդա Սադիգովային և ասել, որ իր դեմ մեղադրանքները կեղծ են։ Նա հայտնել է, որ իրեն բերման են ենթարկել մայիսի 27-ին, մինչև մայիսի 29-ը պահել են Սաբայիլի շրջանի ոստիկանության 39-րդ բաժնում։ Այնուհետև նրան տարել են դատարան և 30-օրյա կալանքի որոշմամբ տեղափոխել կալանավայր։

Թահմազովը կարծում է, որ իրեն պատժել են ֆեյսբուքյան իր էջում կառավարության դեմ արված գրառումների համար, հատկապես՝ նախագահ Իլհամ Ալիևին ուղղված, որում նա մեղադրում է բանտում 3,5 ամիս հացադուլի մեջ գտնվող ընդդիմադիր Ալիզամին Սալաևի առողջության վատթարացող վիճակի համար՝ կոչ անելով ազատ արձակել նրան։

Ձերբակալությունից մի քանի օր առաջ նա գրել էր, որ ոստիկանները եկել են իր տուն և խուզարկություն կատարել։

Ադրբեջանի ՆԳՆ մամուլի ծառայությունը հայտնել է, որ Թահմազովին ձերբակալելու պատճառը կապված չէ սոցցանցում հրապարակման հետ․ նա 30 օրով կալանավորվել է խուլիգանության համար։ Չի նշվում, սակայն, թե նա ինչ է արել։

Հավելենք, որ Թահմազովն իր ֆեյսբուքյան գրառումներով հաճախակի է քննադատում Իլհամ Ալիևի ռազմական հռետորաբանությունը և նրա վարած քաղաքականությունը Հայաստանի ու Արցախի նկատմամբ։ Նա Հայաստանի հետ Ադրբեջանի թշնամանքի վերացման ու հարաբերություններ կարգավորման՝ քիչ թվով ջատագովներից է։

Էմմա Չոբանյան