14.08.2026 | 23:22
Հուլիսին Ուկրաինայում զոհվել է առնվազն 437 խաղաղ բնակիչ՝ ամենաբարձր ցուցանիշը 2022-ից ի վեր. ՄԱԿ
Ալի Բաբաջանն ու Ահմեթ Դավութօղլուն բանակցություններ են վարում իրենց կուսակցությունները միավորելու հարցով
Քաղաքականություն
06.06.2023 | 21:20
Թուրքիայի նախագահ Ռեջեփ Թայիփ Էրդողանի նախկին կուսակիցներ, այժմ ընդդիմադիրներ Ալի Բաբաջանի «Ժողովրդավարություն ու առաջընթաց» (DEVA) և Ամհեդ Դավութօղլուի «Ապագա» (Gelecek) կուսակցությունները բանակցություններ են վարում, գրում են թուրքական լրատվամիջոցները։
Sözcü-ի հոդվածագիր Սայգի Օզթուրքը հայտնել է, որ բանակցություններն ընթանում են կուսակցությունների միավորման հարցով։
««Ժողովրդավարություն ու առաջընթաց» կուսակցությունը, որը գլխավորում է Ալի Բաբաջանը, ունի 15 պատգամավոր, իսկ «Ապագա» կուսակցությունը, Ահմեդ Դավութօղլուի գլխավորությամբ, 10 պատգամավոր։ Այս երկու քաղաքական կուսակցությունների միավորման շուրջ բանակցություններ են ընթանում»,- գրել է նա։
Դավութօղլուն FOX TV-ի եթերում Իլքեր Կարագյոզի հետ զրույցում մեկնաբանել է այս լուրերը։
«Անհրաժեշտ է ընդդիմություն, որը կարող է ստեղծել նոր աջ ընդդիմության հիմքը և պատրաստվել իշխանության գալուն։ Ապագան, DEVA-ն, Սաադեթը և Դեմոկրատական կուսակցությունը պետք է համախմբվեն»,- ասել է նա։
DEVA կուսակցության փոխնախագահ Իդրիս Շահինն էլ ասել է, որ ինստիտուցիոնալ հանդիպում դեռ չի եղել, բայց դա չի նշանակում, որ ապագայում դա տեղի չի ունենա: DEVA կուսակցության մի աղբյուր էլ, որը չի ցանկացել ներկայանալ, նշել է, որ բանակցությունները շարունակվում են և առայժմ դրական են ընթանում:
Էմմա Չոբանյան
