06.06.2026 | 16:10
Դատախազությունը զգուշացնում է՝ վարժական հավաքից խուսափելը հանցագործություն է. այն պատժվում է 1-3 տարի ժամկետով ազատազրկմամբ
Ինչպես է Կախովկայի ՀԷԿ-ի ամբարտակից ջուրը դուրս հեղեղվում. Խերսոնից և հարակից տարածքներից մարդկանց տարհանում են․ ՏԵՍԱՆՅՈՒԹ
Քաղաքականություն
06.06.2023 | 12:13
Չնայած Կախովկա ՀԷԿ-ում տեղի ունեցածի վերաբերյալ ուկրաինական և ռուսական կողմերի փոխադարձ մեղադրանքներին՝ մի հարցում կողմերի կարծիքները համընկնում են․ այն վերանորոգման ենթակա չէ, գրում է BBC-ի ռուսական ծառայությունը։
«Շարժիչի սրահի պայթյունի հետևանքով Կախովկա ՀԷԿ-ը ներսից ամբողջովին ավերվել է։ Կայանը վերականգնման ենթակա չէ»,- հայտարարել է «Ուկրհիդրոէներգոն»։
Մասնագետները դեռ չեն կարողանում հստակ գնահատել սպասվող հեղեղումների ամբողջական ծավալը, սակայն Խերսոնից տեղի բնակչության տարհանումն արդեն սկսվել է։
Ռուսական պետական ՏԱՍՍ գործակալության տվյալներով՝ կայանի ամբարտակի 28 բացվածքների կեսն արդեն քանդված է։
Հավելենք, որ ուկրաինական կողմի հաղորդմամբ՝ ռուսական զորքերը վաղ առավոտյան պայթեցրել են Կախովկա ՀԷԿ-ի ամբարտակը։ ՌԴ-ն հերքում է այս լուրերը՝ իր հերթին Կիևին մեղադրելով համազարկային կրակի ռեակտիվ համակարգերից ՀԷԿ-ին հարված հասցնելու մեջ։
Ուկրաինական ԶԼՄ-ները հայտնում են, որ Խերսոնի ութ բնակավայր ու մեկ միկրոշրջան պայթյունի հետևանքով ամբողջովին կամ մասնակի հեղեղվել է։ Խերսոնի տարածաշրջանային ռազմական շրջանի ղեկավար Ալեքսանդր Պրոկուդինը հայտնել է, որ կազմակերպվում է ավտոբուսներով բնակավայրերի բնակիչների տարհանում դեպի Խերսոն քաղաք, ապա Նիկոլաև, այնտեղից՝ Խմելնիցկի, Օդեսա, Կրոպիվնիցկի, Կիև և Ուկրաինայի այլ քաղաքներ։
