07.10.2026 | 23:48
Արթուր Դանիելյանը կալանավորվեց
Թեհրանն արձագանքել է Բաքվի ԱԳՆ-ի՝ իր քաղաքացիներին ուղղված Իրան չայցելելու կոչին
Քաղաքականություն
05.06.2023 | 18:15
Պաշտոնական Թեհրանն արձագանքել է Ադրբեջանի ԱԳՆ-ի՝ օրերս արած հայտարարությանը, որով իր քաղաքացիներին կոչ է անում չայցելել Իրան։
«Հաշվի առնելով այս տարվա հունվարին Իրանի Իսլամական Հանրապետությունում Ադրբեջանի դեսպանատան դեմ իրականացված «ահաբեկչական գործողությունը», որի հետևանքով Իրանում սահմանափակվեց մեր դիվանագիտական ներկայացուցչությունը, Ադրբեջանի քաղաքացիներին խստորեն խորհուրդ է տրվում չայցելել Իրան առանց անհրաժեշտության, իսկ երկիր մուտք գործողներին էլ՝ լինել ուշադիր»,-ասվում է Ադրբեջանի ԱԳ հայտարարության մեջ։
Իրանի ԱԳՆ խոսնակ Նասեր Քանանին իր թվիթերյան էջում անդրադարձել է այս հայտարարությանը։ «Մեր քաղաքականությունը մնում է նույնը․ հենվել վիզաների չեղարկման ու գրկաբաց մեր ադրբեջանցի քույրերին ու եղբայրներին ընդունելու վրա։ Հարևանության քաղաքականության շարունակությունը մեր օրակարգի առաջին տեղում է, իհարկե, փոխադարձ հարգանքի և հարևանության ավանդույթների նկատմամբ հարգանքի շրջանակներում»,- մասնավորապես, գրել է նա։
Հավելենք, որ Բաքվի ու Թեհրանի հարաբերությունները շարունակում են լարված մնալ։ Օրերս էլ տեղեկություններ տարածվեցին, որ Իրանում Ադրբեջանի քաղաքացի Ֆարիդ Սաֆարլին է ձերբակալվել լրտեսության մեղադրանքով։ Ադրբեջանում էլ ակտիվորեն շարունակվում են կրոնական տարբեր գործիչների ձերբակալությունները Իրանի օգտին լրտեսություն կատարելու կասկածանքով։
Էմմա Չոբանյան
