Երկու շաբաթվա ընթացքում Գերմանիան Ուկրաինային կործանիչներ փոխանցելու վերաբերյալ որոշում կկայացնի

Գերմանիայի կառավարությունը կարող է վերանայել իր դիրքորոշումն Ուկրաինային ժամանակակից արևմտյան կործանիչների հնարավոր մատակարարման վերաբերյալ, DW-ին տված հարցազրույցում ասել է Գերմանիայի պաշտպանության նախարար Բորիս Պիստորիուսը։

«Հիմա մենք գտնվում ենք վերիմաստավորման փուլում և ստուգում ենք՝ ինչն է հնարավոր և ինչ մենք ցանկանում ենք ու կարող ենք անել։ Կարծում ենք, որ մենք առաջիկա երկու շաբաթների ընթացքում կկողմնորոշվենք»,- ասել է նա։

Միաժանանակ, գերմանացի պաշտոնյան կրկին մերժել է Կիևին «Տավրուս» թևավոր հրթիռներ փոխանցելու հնարավորությունը։ Պատասխանելով Ռուսաստանի տարածքում Ուկրաինայի կողմից գերմանական զենքի կիրառման մտահոգությունների մասին հարցին՝ նա նշել է, որ միջազգային իրավունքը թույլ է տալիս դա անել ինքնապաշտպանության նպատակով։ Սակայն, նրա խոսքով, Բեռլինը, ինչպես Վաշինգտոնը, միշտ ընդգծել է, որ իրենք չէին ցանկանա՝ իրենց զենքն օգտագործվեր ռուսական սահմանը հատելու համար։

«Գերմանական հասարակությունը, գերմանական քաղաքականությունն իրոք փոխել են կարծիքը։ Եթե երկու տարի առաջ ինչ-որ մեկն ինձ ասեր, որ Գերմանիան 3-5 միլիարդ եվրոյի ծանր սպառազինություն է մատակարարելու, ես չէի հավատա»,- ասել է նա։

Պիստորիուսը նշել է, որ անհրաժեշտ է համախմբել աշխարհի բոլոր այն երկրները, որոնք ցանկանում են և կարող են պաշտպանել կանոնների վրա հիմնված աշխարհակարգը։

«Ուկրաինան ինքնիշխան երկիր է, և պետք է որոշի, թե երբ կգա բանակցությունների կամ այլ բանի ժամանակը: Դա մեզանից կախված չէ»,- հավելել է Գերմանիայի ՊՆ ղեկավարը։

Սինգապուրում անցկացվող միջազգային անվտանգության ֆորումում Պիստորիուսը կոչ է արել հնդկախաղաղօվկիանոսյան երկրներին հստակ դիրքորոշում ընդունել միջազգային անվտանգության ճարտարապետության վրա հարձակումների դեմ, ինչպիսին է Ռուսաստանի ներխուժումն Ուկրաինա:

Էմմա Չոբանյան