06.08.2026 | 21:20
Մոսկվան Երևանից պաշտոնական դիմում չի ստացել երկաթուղու կոնցեսիան դադարեցնելու վերաբերյալ
Լիբանանի խորհրդարանը հունիսի 14-ին երկրի նախագահի ընտրության հարցով 12-րդ քվեարկությունը կանցկացնի
05.06.2023 | 16:06
Լիբանանի նոր նախագահի ընտրության հարցով Պատգամավորների պալատի նիստը տեղի կունենա հունիսի 14-ին։ Այս մասին հայտնել է խորհրդարանի նախագահ Նաբիհ Բըրրին, հաղորդում է ՏԱՍՍ-ը։
«Քվեարկությունը տեղի կունենա չորեքշաբթի՝ հունիսի 14-ին, Էտուալ հրապարակում գտնվող Խորհրդարանի պալատում»,- ասվում է խորհրդարանի խոսնակի գրասենյակի տարածած հայտարարության մեջ։
Բըրրին ընտրությունների հաջորդ փուլի ամսաթիվ է նշանակել այն բանից հետո, երբ ընդդիմադիր խմբակցությունները հունիսի 4-ին նախագահի նոր թեկնածու են առաջադրել՝ Արժույթի միջազգային հիմնադրամի Մերձավոր Արևելքի և Կենտրոնական Ասիայի մասնաճյուղի տնօրեն Ջիհադ Ազուրին, որը 2005-2008 թվականներին աշխատել է որպես երկրի ֆինանսների նախարար։
Ազուրը ստացել է երկու հիմնական քրիստոնեական բլոկների աջակցությունը, որոնք գլխավորում են «Լիբանանյան ուժեր» կուսակցությունը և «Ազատ հայրենասիրական շարժումը»:
Հունվարի 19-ին Լիբանանի խորհրդարանի անդամները 11-րդ անգամ անցկացված քվեարկության ժամանակ չեն կարողացել երկրի ղեկավար ընտրել։ Պետական բարձրագույն պաշտոնը թափուր է 2022 թվականի հոկտեմբերի 31-ից՝ այն բանից հետո, երբ գեներալ Միշել Աունը վեցամյա պաշտոնավարման ժամկետի ավարտից հետո լքեց Բաաբդա նախագահական պալատը։
